Policia e Shtetit njoftoi sekuestrimin e 7 kilogramëve kokainë në portin e Durrësit brenda një konteineri me prodhime deti të importuara nga Ekuadori –rasti i katërt i identifikuar brenda një muaji.
Një tjetër dërgesë prej 7 kilogramësh kokainë u sekuestrua të premten në portin e Durrësit brenda një konteineri të ngarkuar me fruta deti, që ishte nisur nga Ekuadori në drejtim të Tiranës.
“Si rezultat i kontrollit të imtësishëm të ushtruar në kontenier, në pjesën e kapakëve të ventilimit u gjetën pako me lëndë narkotike të dyshuar kokainë… dhe një GPS, të cilat u sekuestruan në cilësinë e provës materiale,” deklaroi Policia e Shtetit.
Sipas Policisë, prodhimet e detit ishin importuar nga Ekuadori për llogari të kompanisë
“Fish Co” me seli në Tiranë. Policia shtoi në deklaratë se kishte arrestuar administratorin e kompanisë në kushtet e flagrancës.
Sipas të dhënave nga Qendra Kombëtare e Biznesit, kompania “Fish CO” e ka selinë në afërsi të Kasharit në autostradën Tiranë-Durrës dhe administrohet nga 35-vjeçari Denis Doda.
Operacioni i së premtes, i koduar nga policia me emrin “Urbanor” shënon rastin e katërt brenda një muaji të kapjes së sasive të kokainës në kontejnerët e ardhur nga vendet e Amerikës Latine.
Tre sekuestrimet e mëparshme ndodhën gjatë korrikut në konteinerët me banane të porositur nga kompania “Alba Exotic Fruit”, ku u bllokuan në total 25 kilogramë kokainë –
një sasi e vogël krahasuar me dërgesat e tjera të kapura në port, si ajo e 18 qershorit, ku brenda një kamioni që vinte nga Maqedonia e Veriut, u sekuestruan rreth 300 kg lëndë narkotike të dyshuar si kokainë.
Policia njoftoi gjithashtu se hetimet po vazhdonin nën drejtimin e Prokurorisë së Durrësit për identifikimin dhe kapjen e personave të tjerë të përfshirë në këtë episod të trafikut ndërkombëtar të kokainës nga vendet e Amerikës Latine.
