Ndërsa flakët kanë përfshirë të gjithë rajonin e Ballkanit, policia ka arrestuar dhjetëra njerëz të dyshuar për zjarrvënie të qëllimshme në fusha dhe pyje.
Policia shqiptare të martën tha se 15 persona ishin arrestuar për zjarrvënie të qëllimshme që nga 25 korriku në lidhje me zjarret që kanë ndodhur për rreth dy javë në vend.
Zjarret kanë shkatërruar qindra hektarë pyje në Shqipëri, ndërsa autoritetet janë përpjekur për ditë të tëra për t’i vënë ato nën kontroll. Të hënën autoritetet i kërkuan Forcës së Sigurisë së Kosovës, FSK -së, t’i ndihmonte ata në shuarjen e zjarreve që kërcënojnë autostradën që lidh Shqipërinë dhe Kosovën.
Të mërkurën, policia njoftoi se një person tjetër ishte arrestuar për “shkatërrim të pyjeve dhe mjedisit pyjor” dhe tre persona u shpallën në kërkim. Ndaj një personi tjetër filloi procedimi penal.
Në Kosovën fqinje, 20 persona janë arrestuar së fundmi për zjarrvënie të qëllimshme, ndërsa janë identifikuar 41 të dyshuar të tjerë.
“Policia e Kosovës identifikoi 109 raste zjarrvënieje; 71 raste ‘shkaktimi të rrezikut të përgjithshëm’ dhe 95 incidente zjarri ‘që rrezikojnë jetën e qytetarëve, por edhe pronën në përgjithësi, si private ashtu edhe shtetërore’”, tha policia për BIRN.
Policia tha se kishte filluar procedimin penal për të gjitha rastet e lartpërmendura dhe 41 të dyshuar të tjerë ishin identifikuar dhe 20 prej tyre ishin arrestuar.
Në Greqi, tre persona janë arrestuar për zjarret e ndezura në vend. Sipas faqes greke ethnos.gr, një 43-vjeçar i akuzuar për zjarrvënie në Kryoneri po hiqej si vullnetar; një 47-vjeçar akuzohet se u përpoq t’i vinte zjarrin Petroupolit dhe Agios Dimitriosit në Athinë dhe një grua u arrestua në një park në Athinë.
Në Turqi, të dhënat e sakta për numrin e njerëzve të arrestuar për shkak të zjarreve mungojnë, megjithëse javën e kaluar katër persona u arrestuan në Antalia dhe Bodrum për role të dyshuara në zjarrvënie.
Në Bullgari, më 10 gusht, një burrë në fshatin Petrichko pranë Blagoevgradit u arrestua për shkaktimin e një zjarri. Pavarësisht zjarreve të të mëdha në Kyustendil, Blagoevgrad, Sliven dhe resortin dimëror Borovetz, nuk ka pasur shumë aktivitet policor përsa i përket arrestimeve.
Maqedonia e Veriut, e cila që nga java e kaluar pati dëme të mëdha për shkak të zjarreve në të gjithë vendin, deri më tani ka ndaluar 14 persona nën dyshimin se kanë shkaktuar zjarre.
Shumica u vunë re nga autoritetet ndërsa silleshin në afërsi të zjarreve, tha Ministria e Brendshme. Në disa raste, fajtorët e dyshuar pranuan se kishin shkaktuar zjarre.
Të hënën, pranë kryeqytetit Shkup, policia ndaloi një person të moshuar për ndezjen e një sasie kashte që shkaktoi një zjarr më të vogël. Sipas autoriteteve, ai e kishte pranuar se e kishte bërë këtë.
