Kryeministri Edi Rama konfirmoi përmes një statusi në Facebook gatishmërinë e qeverisë shqiptare për të strehuar përkohësisht emigrantë politikë afganë të rrezikuar nga talebanët, pas një kërkese të ditëve të fundit nga qeveria amerikane.
Kryeministri Edi Rama deklaroi të dielën përmes një statusi të gjatë në Facebook se qeveria e Shqipërisë është e gatshme që të strehojë një numër emigrantësh politikë afganë, pas një kërkese të mbërritur ditët e fundit nga qeveria amerikane.
Rama konfirmoi gjithashtu se kishte mikpritur më herët dy kërkesa të tjera nga ‘institucione shoqërore’ në Shtetet e Bashkuara për strehimin e përkohshëm në Shqipëri të qindra personave nga rrethet intelektuale afgane, mes të cilave edhe gra aktiviste, jeta e të cilëve rrezikohet nga talebanët.
“Është e vërtetë po, se ditët e fundit qeveria amerikane i ka kërkuar Shqipërisë të vlerësojë nëse mund të shërbejë si një vend tranzit, për një numër të caktuar emigrantësh politikë afganë, të cilët destinacion fundor kanë Shtetet e Bashkuara,” shkroi Rama në Facebook.
“Dhe padiskutim që ne nuk do të themi jo, e jo thjesht pse na e kërkojnë aleatët tanë të mëdhenj, po sepse ne jemi Shqipëria,” shtoi Rama, ndërsa evokoi si shembull rolin e shqiptarëve në shpëtimin e hebrenjve gjatë Luftës së Dytë Botërore.
Agjencia e lajmeve Reuters raportoi të premten se administrata e presidentit amerikan, Joe Biden po zhvillonte bisedime me Shqipërinë dhe Kosovën për strehimin e përkohshëm të qindra afganëve që punuan për qeverinë amerikane dhe që tashmë janë në rrezik për shkak të pushtimit të shpejtë të Afganistanit nga talebanët.
Sipas Reuters, disa shtete të tjera në kufi me Afganistanin kishin hezituar më parë, për shkak të shqetësimeve mbi sigurinë dhe situatës së pandemisë së COVID-19.
Në statusin e tij në Facebook, kryeministri Rama nuk sqaroi detaje të tjera nga bisedimet me qeverinë amerikane apo të dhëna mbi numrin e emigrantëve politikë afganë, që Shqipëria është e gatshme të mikpresë.
Ai replikoi megjithatë me valën e kundërshtive të shprehura në rrjetet sociale, për të cilët tha se nuk do ta ndryshonin qëndrimin e tij dhe të shumicës qeverisëse për të mikpritur “të panjohurit në rrezik”.
