Duke parashikuar një valë të re rastesh me COVID-19, Serbia do të fillojë të japë dozën e tretë të vaksinës të martën, edhe pse doza shtesë nuk do të jetë e detyrueshme.
Të martën Serbia do të fillojë dhënien e dozave të treta të vaksinës kundër COVID-19, tha të dielën një anëtare e Shtabit të Krizave për COVID-19, Darija Kisic Tepavcevic.
Kisic Tepavcevic tha se kandidatët kryesorë për dozat e treta janë njerëzit me probleme shëndetësore, të cilët kanë organe të transplantuara ose bëjnë kimioterapi për ndonjë lloj kanceri. Kandidatët e tjerë janë njerëz mbi 70 vjeç dhe ata që punojnë në kujdesin shëndetësor ose social. Por një dozë e tretë do të jetë gjithashtu në dispozicion për këdo që dëshiron një të tillë, njoftoi ajo.
“Asgjë nuk është e detyrueshme. Këto janë rekomandime kryesisht për ata që janë më të rrezikuar për shkak të sëmundjeve që kanë ose për shkak të natyrës së punës së tyre, por është gjithashtu e hapur për të gjithë qytetarët e tjerë kur kanë kaluar më shumë se gjashtë muaj nga vaksina e tyre e dytë”, tha Kisic Tepavcevic për Radio Televizionin e Serbisë, RTS.
Ajo tha se informacioni teknik në lidhje me vaksinën do të njoftohet të hënën dhe njerëzit do të jenë në gjendje të marrin çdo vaksinë si dozë të tretë.
Deri më tani, në Serbi janë në dispozicion vaksinat Pfizer/BionTech, Sinopharm, Sputnik dhe AstraZeneca.
Serbia po përgatitet për një valë të re të COVID-19, me shifrat e të infektuarve tashmë në rritje. Të dhënat e fundit nga e diela tregojnë se rreth 10 për qind e njerëzve të testuar po rezultojnë pozitivë.
Numri i rasteve të reja arriti në 1,000 në fundjavë, që është pothuajse pesë herë më shumë sesa numri i rasteve të reja në fillim të muajit.
Numri i rasteve të reja me COVID-19 po rritet edhe në vendet e tjera të Ballkanit. Sipas të dhënave nga e diela, Kosova regjistroi 1,096 raste të reja, Maqedonia e Veriut 897, Mali i Zi 446, Kroacia 298. Shqipëria 397, Moldavia 140, Rumania 323 dhe Bullgaria 272.
