Duke u ankuar për sharjet mbi makinerinë e tij elektorale si dhe duke pranuar se politika e vendeve të punës për vota është bërë faktor shumë i rëndësishëm për suksesin e tij elektoral, kryeministri Edi Rama shpalli qeverinë e re, e cila do të ketë edhe më shumë gra se sa e shkuara. Më i suksesshmi në zgjedhje, Taulant Balla, duket se u mënjanua.
Kryeministri Edi Rama shpalli kabinetin e ri qeveritar në përfundim të një fjalimi që zgjati mbi një orë, në të cilin, ai deklaroi se ndjehej krenar për suksesin e makinerisë së tij elektorale ndërsa u ankua për ato që i quajti “baltosje” të suksesit të tij elektoral, një referencë për kritikat për keqpërdorim të burimeve shtetërore përmes sistemit kontrovers të patronazhistëve të votës. Ai shpalli gjithashtu se synimi i mandatit të tretë qeverisës do të jetë fitorja e një mandati të katërt.
“Fjala kryesore në çdo takim nuk mund të jetë punësimi në shtet i anëtarëve, apo familjarëve të anëtarëve apo kushërinjve të anëtarëve. Një mbledhje e tillë duhet të konsiderohet e dështuar,” deklaroi Rama.
Rama fitoi zgjedhjet e 25 prillit 2021 mes akuzave për krijimin e një makinerie elektorale që ushqehet me keqpërdorimin e burimeve shtetërore dhe që përdor metoda shantazhi për të detyruar qytetarët të votojnë këtë parti. Pak para zgjedhjeve, një databazë e socialistëve e rrjedhur në media zbuloi se si mijëra zyrtarë të kësaj partie, kryesisht të punësuar në shtet, shënjojnë çdo votues një më një të armatosur me të dhënat personale të qytetarëve, përfshirë punëdhënësit dhe punësimet e familjarëve apo probleme të ndryshme ligjore, kryesisht me titujt e pronësisë. Por në së paku një rast, një person I dënuar për trafik droge në Elbasan ishte gjithashtu patronazhist.
Rama nuk e mohoi faktin që suksesi i tij elektoral i dedikohet makinerisë ndërsa u ankua ndaj kritikave. “[Zgjedhjet] ishin një arritje e re e makinerisë sonë politike, e cila është krenaria e kësaj partie,” deklaroi ai ndërsa iu referua kritikëve si persona që “flasin por nuk e dinë se çfarë flasin”.
Në qeverinë e re, Erjon Braçe humbi pozicionin dhe u zëvendësua nga Arben Ahmetaj. Braçe nuk u përmend as në ndonjë funksion në Partinë Socialiste. Ai ka qenë zëvendëskryeministër gjatë viteve të fundit dhe në përgjithësi personi që ka firmosur aktet e qeverisë në mungesë të kryeministrit.
Olta Xhaçka u konfirmua në postin e ministres së jashtme ndërsa Niko Peleshi në atë të mbrojtjes.
Etilda Gjonaj humbi postin në qeveri dhe u zëvendësua nga Ulsi Manja, më parë kryetar i komisionit të ligjeve në parlament.
Anila Denaj humbi postin në qeveri për t’u zëvendësuar nga Delina Ibrahimi, ish-këshilltare e Ramës, aktualisht drejtoreshë e tatimeve.
Blendi Klosi, i cili mori lavde për suksesin elektoral në fjalim, humbi postin e ministrit të Turizmit dhe Mjedisit për t’u zëvendësuar nga Mirela Kumbaro.
Surprizë ishte Frida Krifca, aktualisht Drejtoreshë e Agjencisë për Zhvillimi Bujqësor dhe Rural, u bë ministre e Bujqësisë.
Rama konfirmoi në detyrë Ogerta Manastirliun në Ministrinë e Shëndetësisë, Belinda Ballukun në të Infrastrukturës, Elvis Kushin te Arsimi dhe Elva Margaritin te Ministria e Kulturës.
Rama shtoi edhe katër “ministra pa portofol” të njohur si “ministra shteti”, Elisa Spiropalin, ministre për Marrëdhëniet me Parlamentin, Edona Bilalin, ministre e Shtetit për Mbrojtjen e Sipërmarrjes, Bora Muzhaqin ministre e Shtetit për Rininë dhe Fëmijët dhe Milva Ekonomni ministre e Shtetit për Standardet dhe Shërbimet.
Rama shpalli gjithashtu ndryshime në partinë e vet, ku ndryshimi më i rëndësishëm duket se ishte mënjanimi i Taulant Ballës, i cili arriti sukses në zgjedhjet në Elbasan, mes akuzave për lidhje me krimin e organizuar. Balla u shpall drejtues politik i qarkut të Fierit dhe do të mbetet kreu i grupit parlamentar.
Ndërkohë Damian Gjiknuri, ish-ministër i infrastrukturës në kohën e skandalit DH Albania, u shpall sekretar i përgjithshëm duke zëvendësuar Taulant Ballën.
