Demokratët depozituan kërkesën për ngritjen e një komisioni hetimor për tre kontratat koncensionare për trajtimin e plehrave urbane. Deputetja Jorida Tabaku tha se paligjshmëritë në kontrata ishin të shumta “duke vendosur të gjithë qeverinë në shërbim të një biznesi”.
Partia Demokratike ka depozituar të premten në Kuvend kërkesën për hetim parlamentar për kontratat koncensionare të qeverisë për ndërtimin e tre inceneratorëve.
Deputetja Jorida Tabaku, e cila është propozuar nga partia e saj si kryetare e komisionit hetimor, tha se me këto kontrata: “Janë shkelur të gjitha ligjet dhe rregullat…duke vendosur të gjithë qeverinë në shërbim të një biznesi të vetëm”.
“Me 17 vendime brenda ditës është dhënë inceneratori i Elbasanit, ku ka pasur një shkelje të jashtëzakonshme të të gjithë procedurave, vetëm e vetëm për t’i dhënë këtij biznesi, këtij individi, Klodian Mërtiri të lidhur me qeverinë, të lidhur me anëtarët e qeverisë një kontratë konçesionare”- shkoi Tabaku në njoftim për depozitimin e kërkesës për hetim parlamentarë.
Në dokumentin e dorëzuar nga deputetja Jorida Tabaku, thuhet se ky komision do të ketë si qëllim: “Kontrollin e ligjshmërisë së veprimeve administrative dhe procedurës së ndjekur nga ana e organeve të pushtetit ekzekutiv në procedurat konkurruese për ndërtimin dhe administrimin e impianteve të trajtimit të mbetjeve urbane.”
PD argumenton në kërkesë se ka të dhëna të mjaftueshme për shkelje të ligjeve të caktuara në procedurat e ndjekura nga qeveria për dhënien e tre kontratave për ngritjen e inceneratorëve në Elbasan, Fier dhe Tiranë me vlerë qindramilionë euro.
Hetimi do të fokusohet në verifikimin e ligjshmërisë së veprimeve administrative dhe procedurës së ndjekur nga ana e ministrisë së Mjedisit si autoritet kontraktor, si dhe nga organe të tjera publike të përfshira në procedurat konkurruese, dëmin ekonomik që i shkaktohet buxhetit dhe efektet negative mjedisore.
Deputetja demokrate solli në vëmendje faktin se kjo çështje është nën hetim nga Struktura e Posaçme Kundër Korrupsionit dhe Krimit të Organizuar, (SPAK), por sipas saj “asnjë nga përfaqësuesit e qeverisë që është sot në qeveri, nuk është në hetim, ndërkohë që në gjykimin tonë, të paktën kryeministri dhe zoti Ahmetaj, si dy persona kyç në aferën e incineratorëve, duhej të ishin’.
Në një prononcim të mëhershëm kur njoftoi se do të kërkohej ngritja e komisionit, kreu i PD Lulzim Basha e cilësoi projektin si “Mafia e inceneratorëve”.
Hetimi prek dhënien me koncesion me vlerë qindra milion euro për ndërtimin e inceneratorëve dhe për menaxhimin e fushave të depozitimit të mbetjeve në Elbasan, Tiranë dhe Fier. Tre kontratat në fjalë janë fituar nga kompani që duket se janë të lidhura me njëra-tjetrën. BIRN zbuloi shtatorin e kaluar se Mirel Mërtiri, i afërt me ish-ministrin e Financave, Arben Ahmetaj dhe me lidhje në të dyja krahët e politikës, qëndron në hijen e koncesioneve të mbetjeve në Shqipëri përmes një rrjeti kompanish satelite. Mërtiri ka hedhur BIRN në gjyq për “dëm moral dhe ekzistencial”.
Nga ana tjetër, ish-Ministri i Mjedisit Lefter Koka, u akuzua nga ish-partia e tij, Lëvizja Socialiste për Integrim, se ka përfituar 3.3 milionë euro përmes një rrjeti kompanish fantazmë të paguara nga incineratori i Elbasanit. Koka iu përgjigj akuzës duke akuzuar LSI-në si “mosmirënjohëse” ndërsa i konsideroi akuzat si “shpifje”.
