Prokuroria e Rrethit Gjyqësor Gjirokastër ka hedhur poshtë raportimet në media se po hetohet nga Struktura e Posaçme Kundër Krimit të Organizuar dhe Korrupsionit, SPAK.
Nëpërmjet një njoftimi për shtyp, Prokuroria e Rethit Gjyqësor Gjirokastër mohoi të premten lajmet e publikuara në media se zyrat e saj janë bastisuar nga agjentë të Byrosë Kombëtare të Hetimit, BKH si pjesë së një hetimi të iniciuar nga SPAK.
“Në përgjigje të interesimit të gazetarëve në lidhje me lajmin e shpërndarë sot, sipas të cilit hetues nga Byroja Kombëtare e Hetimit kanë sekuestruar disa fashikuj të çështjeve penale të caktuara pranë kësaj prokurorie, çmon të nevojshme që nëpërmjet kësaj deklarate, të sqarojë publikun se një lajm tillë i shpërndarë nëpërmjet portaleve apo mediave të caktuara, nuk është aspak i vërtetë,” tha Prokuroria e Gjirokastrës.
“Prokuroria pranë Gjykatës së Shkallës së Parë Gjirokastër garanton publikun se do të vazhdojë veprimtarinë e saj, në përputhje me detyrimet kushtetuese dhe legjislacionin në tërësi,” shtoi ajo.
Një numër mediash online dhe televizive raportuan të premten se BKH kishte zbarkuar në zyrat e Prokurorisë së Rrethit Gjirokaster dhe kishte sekuestruar një numër fashikujsh hetimorë si pjëse të nje hetimit për korrupsion të iniciar nga SPAK.
Madje, një portal mbante titullin bombastik: ‘FBI’ zbarkon në Gjirokastër, duke e cilësuar Byronë Kombëtare të Hetimit si ‘FBI’-ja shqiptare.
