Kryetarja e komisionit, Jorida Tabaku kërkoi dëshmitarë kryeministrin Rama dhe tre ish-ministra për procedurat e koncesioneve, ndërsa Felaj propozoi vizitë në inceneratorët e rinj të mbetjeve urbane.
Komisioni hetimor parlamentar ‘për inceneratorët’ nisi punën të martën nën drejtimin e deputetes demokrate, Jorida Tabaku. Nënkryetare e komisionit u zgjodh Ermonela Felaj nga Partia Socialiste.
Tabaku tha se komisioni do të shqyrtojë ligjshmërinë e procedurave për dhënien me koncesion të impianteve të trajtimit të mbetjeve në Elbasan, Fier dhe Tiranë, për të cilat tha se “ligji është shkelur me të dyja këmbët”.
Tabaku përmendi gjithashtu se PD ka dërguar tre kallëzime të ndryshme në SPAK për inceneratorët, por që sipas saj nuk ka ende asnjë masë.
“Shqiptarët vazhdojnë të paguajnë me flori djegien e plehrave të tyre, pasi qeveria i ka detyruar të paguajnë tre kompani që kanë një pronar të lidhur me ish ministra, kryetarë bashkie dhe ministra të tyre përmes formave të ndryshme klienteliste,” tha Tabaku.
“Këtu do të japin llogari nga i pari tek i fundit, deri te kryeministri,” shtoi ajo.
Si nismëtare e komisionit, Partia Demokratike ka kërkuar si dëshmitarë kryeministrin Edi Rama, ish-ministrat Arben Ahmetaj, Lefter Koka dhe Damian Gjiknuri, kryebashkiakët e Tiranës, Elbasanit dhe Fierit si dhe përfituesit e koncesioneve, Mirel Mërtiri, Klodian Zoto dhe Stela Gugallja.
Nënkryetarja e komisionit, Ermonela Felaj u kërkoi deputetëve të opozitës që si pjesë të hetimit parlamentar të vizitonin nga afër zonat e trajtimit të mbetjeve, ku përmendi edhe venddepozitimin e Porto Romanos.
“Ju nuk mund të thoni se nuk ka përfunduar puna, kur procedurat janë kryer, “ tha Felaj, ndërsa shtoi se ‘duhet të kuptojmë pse ju futëm strategjisë së landfilleve dhe inceneratorëve”.
Por Tabaku e refuzoi kërkesën, duke theksuar se komisioni nuk mund të kthehet në zyrë propagande për industrinë e trajtimit të mbetjeve.
Komisioni hetimor parlamentar ka afat deri me 15 janar për të kryer hetimin dhe për të dalë me një raport gjetjesh për ligjshmërinë e veprimeve të institucioneve shtetërore në dhënien e kontratave koncensionare për impantet e përpunimit të mbetjeve urbane.
