COVID-19 ka rënë në vendin e tretë në një renditje globale të shqetësimeve kryesore në botë. Varfëria, pabarazia sociale dhe papunësia tani i kanë lënë pas shqetësimet në lidhje me pandeminë, zbulon Ipsos në raportin e tij “Çfarë e shqetëson botën?” për tetor 2021.
Ndryshimet klimatike janë në vendin e dhjetë në listë, megjithëse tendenca e ankthit afatgjatë është në rritje.
Bota po shqetësohet më shumë për varfërinë, pabarazinë sociale dhe papunësinë sesa për COVID-19, tregon një sondazh i ri.
Sondazhi më i fundit i Ipsos “Çfarë e shqetëson botën?” për tetorin 2021 zbulon se është hera e parë në 18 muaj që koronavirusi ka rënë nga vendi i parë në listën e gjërave që shqetësojnë botën.
Për të përpiluar renditjen, Ipsos ndjek opinionin publik mbi çështjet më të rëndësishme sociale dhe politike sot në 28 vende. Ai mbështetet në të dhëna 10-vjeçare për të vendosur rezultatet më të fundit në kontekst.
“Koronavirusi ka rënë në vendin e tretë këtë muaj, me një rënie prej shtatë vendesh në renditjen globale”, hotë Ipsos.
Shqetësimi më i madh në botë
Varfëria dhe pabarazia sociale tani janë shqetësimet kryesore të botës. Mesatarisht, 33% e njerëzve të anketuar në të gjitha vendet thonë se këto janë shqetësimet kryesore – më i larti i regjistruar që nga shkurti 2020.
Papunësia është shqetësimi i dytë më i madh në botë, thotë Ipsos, i renditur në këtë vend mesatarisht nga 30% e njerëzve të anketuar.
Pas koronavirusit në vendin e tretë, korrupsioni financiar dhe politik, si dhe krimi dhe dhuna, janë shqetësimet e katërta dhe të pesta kryesore në botë, zbulon Ipsos.
Sa të shqetësuar janë njerëzit për klimën?
Ndryshimet klimatike zënë vendin e 10-të si një shqetësim botëror, pas kujdesit shëndetësor, arsimit, taksave dhe inflacionit. Por të dhënat e Ipsos tregojnë se tendenca e ankthit afatgjatë është në rritje.
“Në të gjitha vendet, mesatarisht 15% e njerëzve i konsiderojnë ndryshimet klimatike si një nga temat më shqetësuese në vendin e tyre sot”, thotë Ipsos.
Dallimet në vende të ndryshme
Njerëzit në Kanada, Gjermani dhe Australi janë më të shqetësuarit për ndryshimet klimatike.
Vendet më të shqetësuara për varfërinë dhe pabarazinë sociale janë Hungaria dhe Rusia, të ndjekura nga Kolumbia dhe Brazili.
Në Afrikën e Jugut, dy të tretat e njerëzve (67%) thonë se papunësia është një shqetësim kryesor, thotë Ipsos. Më shumë se gjysma e të anketuarve në Spanjë, Itali dhe Kolumbi janë dakord me këtë.
Malajzia është vendi më i shqetësuar për COVID-19, me 64% të të anketuarve në sondazh që e zgjedhin këtë si një shqetësim kryesor. Meksika, Gjermania, Peruja dhe Brazili kanë parë të gjitha rënie të konsiderueshme në përqindjen e publikut që e rendit pandeminë si një shqetësim kryesor.
Sondazhi u krye në internet me më shumë se 20,000 të rritur të moshës 18-74 vjeç në Kanada, Izrael, Malajzi, Afrikën e Jugut, Turqi dhe Shtetet e Bashkuara, dhe 16-74 vjeç në të 21 vendet e tjera.
Marrë me autorizim nga Weforum.org This is what the world is worrying about right now
