Presidenti Ilir Meta ka rikthyer për rishqyrtim në Kuvend ligjin e shumëdebatuar, duke argumentuar se shkel Kushtetutën dhe autonominë e pushtetit vendor si dhe centralizon më shumë pushtet tek një agjenci në varësi direkte të kryeministrit.
Ligji “Për Bashkëqeverisjen”, i cili forcon me kompetenca një agjenci për trajtimin e ankesave të qytetarëve nën varësinë e kryeministrit, nuk është dekretuar nga Presidenti Ilir Meta. Presidenca njoftoi të martën se e ka rikthyer ligjin e shumëdebatuar në Kuvend për rishqyrtim, duke e shoqëruar dekretin e tij me një sërë argumentesh ligjorë.
Në një relacion të gjatë shoqërues, Presidenca argumenton se ligji shkel Kushtetutën dhe autonominë e pushtetit vendor; krijon institucione paralele dhe mbivendosje kompetencash ndërmjet tyre duke shkelur sigurinë juridike; centralizon më shumë pushtet tek një institucion në varësi direkte nga Kryeministri; bie ndesh me Jurisprudencën e Gjykatës Kushtetuese, si dhe bie ndesh me parimet e funksionimit të administratës shtetërore të saksionuara në Kode dhe Ligje të tjera.
“Një sistem i unitetit institucional që po synohet të realizohet me anë të legjitimimit të Agjencisë, do të shërbejë për të rigrupuar edhe organet e pushtetit vendor në një autoritet të vetëm qendror, e në fund si produkt do të gjendet, vetëm centralizim i pushtetit duke homogjenizuar hapësirat institucionale,” thuhet në relacion.
Po ashtu, argumentohet se ligji për “Bashkëqeverisjen” bie ndesh me ligjin “Për ndërmjetësimin në zgjidhjen e mosmarrëveshjeve” si dhe me Kodin e Procedurave Administrative.
Presidenti e quan “ironike” edhe faktin që një ligj që synon bashkëqeverisjen me qytetarët nuk është konsultuar me publikun, sipas parashikimeve të ligjit “Për njoftimin dhe konsultimin publik”.
Ligji “Për Bashkëqeverisjen” u miratua vetëm me votat e mazhorancës me kundërshtimin e opozitës dhe disa organizata për të drejtat e njeriut, të cilat dërguar opinionet e tyre pranë Komisionit Parlamentar të Ligjeve. Agjencia për Dialog dhe Bashkëqeverisje që do të funksionojë në bazë të këtij ligji nën varësinë e Kryeministrit merr kompetenca për të kontrolluar punën në administratën qendrore dhe asaj vendore dhe çdo institucioni tjetër publik, për të cilët ankohen qytetarët dhe mund të ndërmarrë masa administrative ndaj tyre.
