Një nismë e deputetit socialist Arben Pëllumbi parashikon zgjatjen e afatit dhe me dy vjet të tjera për kërkesat e subjekteve të interesuara për investime strategjike, një ligj që ka shkakuar debate dhe kritika për mënyrën e zbatimit, kryesisht në Jug të vendit.
Një ligj i qeverisë për “Për investimet strategjike”, i cili parashikonte dhjetorin e këtij viti si afat ligjor për kërkesat e subjekteve investuese, pritet që të zgjasë afatet dhe me dy vite të tjera, nëse miratohet një propozim i depozituar në Kuvend nga deputeti socialist Arben Pëllumbi.
“Me anën e këtij projektligji synohet zgjatja e afatit të paraqitjes së kërkesave nga subjektet investuese të interesuara për përfshirjen në procedurat për përfitimin e statusit, investim/investitor strategjik, procedurë e asistuar/e veçantë,” nga 31 dhjetor 2021 ne date 31 dhjetor 2023″- thuhet në propozimin e publikuar të martën në faqen zyrtare të Kuvendit.
Në relacionin shoqërues të propozimit të Pëllumbit sillet si argument për shtyrjen e këtij afati, që bëhet për herë të dytë, mungesa e një ligji të posaçëm për investimet. “Shtyrja e këtij afati është miratuar edhe më parë pasi nga ana e Ministrisë së Financave dhe Ekonomisë është në proces hartimi i një projektligji “Për investimet”, i cili ka lindur si domosdoshmëri, pasi legjislacioni në fuqi në Republikën e Shqipërisë i jepte një mbrojtje shtesë investimeve të huaja, por jo atyre vendase, ndërkohë që një korpus i ri ligjor më vete ishte krijuar për investimet strategjike. Për shkak të pandemisë COVID 19, ka qenë i pamundur finalizimi i këtij projektligji të ri “Për investimet””- thuhet në relacion.
Ligji për investimet strategjike u miratua nga Kuvendi në vitin 2015. Ai i njeh statusin investitor strategjik në turizëm çdo projekti që investon më shumë se 5 milionë euro dhe punëson 80 punëtorë. Në dhjetor të vitit 2015, qeveria ka miratuar gjithashtu 10 vendime me qëllim lehtësimin dhe rregullimin e procedurave për investitorët strategjikë, duke i mundësuar konsolidimin e titujve të pronësisë.
Sipas këtyre vendimeve, shteti është i detyruar t’i ofrojë investitorëve strategjikë infrastrukturë ndihmëse, si furnizim dhe përshtatje të rrjetit elektrik, furnizim me ujë të pijshëm, kanalizime dhe trajtim të ujërave të ndotura, dhe infrastrukturë rrugore.
