Këshilli i Lartë i Prokurorisë pranoi kërkesën e Inspektorit të Lartë të Drejtësisë dhe vendosi shkarkimin e prokurorit të Pogradecit Shkëlqim Kokona, për një sërë shkeljesh.
Këshilli i Lartë i Prokurorisë pranoi të premten kërkesën e Inspektorit të Lartë të Drejtësisë dhe vendosi unanimisht shkarkimin e prokurorit të Pogradecit Shkëlqim Kokona.
Kokona u procedua nga ILD për një sërë shkeljesh, ndër të tjera edhe për “mosnxjerrja në 28 raste (2019-2021), e urdhrave për ekzekutimin e vendimeve gjyqësore të dënimit me burgim për të cilat është aplikuar pezullimi i ekzekutimit me kusht”.
Sipas Inspektorit të Lartë të Drejtësisë Artur Metani, prokurori po ashtu kishte “shkelje të përsëritur dhe të rëndë të rregullave të solemnitetit, rregullave të mirësjelljes në marrëdhëniet me palët, me drejtuesit e prokurorisë, me gjyqtarët, me oficerë të policisë gjyqësore, si dhe me personelin e administratës së prokurorisë dhe të gjykatës”.
Kokona u fajësua edhe për sjellje që “kanë sjellë shkelje të rënda profesionale, diskreditim të pozitës dhe figurës së prokurorit, si dhe kanë cënuar besimin e publikut te drejtësia”.
Në seancën dëgjimore të zhvilluar në 13 dhjetor Kokona i mohoi shkeljet e pretenduara nga ILD dhe kërkoi rrëzimin e kërkesës.
I mbledhur në seancë të premten KLP, pasi pranoi vetë përjashtimin nga çështja të dy anëtarëve të tij Vatë Staka dhe Nurihan Seiti, vendosi në dhomë këshillimi të pranonte kërkesën për shkarkim.
Kreu i KLP Gent Ibrahimi tha në leximin e vendimit se ndaj Kokonës ishte miratuar masa e shkarkimit nga detyra dhe ulja e rrogës me 50 për qind deri në datën që vendimi do të marrë formë të prerë.
“Me votë unanime, KLP vendosi të pranojë kërkesën e ILD për dhënien e masës disiplinore “Shkarkim nga detyra” për prokurorin”, thuhet në njoftimin e KLP.
Shënim: Ky shkrim u përditësua për të korrigjuar foton.
