Mbështetësit e ish-kryetarit Sali Berisha votuan në një “referendum” për shkarkimin e kryetarit aktual Lulzim Basha ndërsa mbështetësit e Bashës votuan në një “kongres” për të shpallur “nul” vendimet e mbështetësve të Berishës, në atë që mund të shënohet si përçarja më e thellë në këtë parti që nga themelimi i saj tre dekada më parë.
Mbështetësit e ish-kryetarit demokrat Sali Berisha votuan të dielën në një palë zgjedhjesh të brendshme të cilat i quajtën “referendum” dhe vendosën në shumicë dërrmuese shkarkimin e kryetarit aktual Lulzim Basha. Basha dhe mbështetësit e tij organizuan një “kongres kombëtar” të partisë ku shpallën të pavlefshme veprimet e palës tjetër.
Sipas mbështetësve të Berishës, afro 44 mijë anëtarë votuan në të gjithë vendin për të rrëzuar Lulzim Bashën si kryetar ndërsa sipas mbështetësve të Bashës, mbi 5 mijë delegatë të Kuvendit Kombëtar rrëzuan veprimet e Berishës.
“43385 demokratë kanë votuar pro shkarkimit të Lulzim Bashës, duke ratifikuar vendimin numër 6 të kuvendit”, deklaroi Albana Vokshi, një mbështetëse e Berishës, mbrëmjen e së dielës.
Ndërsa rezoluta e mbështetësve të Bashës deklaroi se çdo “qëndrim apo vendim i këtij tubimi është nul dhe nuk ka asnjë vlerë politike dhe ligjore për Partinë Demokratike”.
Dita e dielë ishte e tensionuar për të gjithë mbështetësit e partisë kryesore opozitare në vend, ku në çdo degë duket se pati mbështetës të palëve kundërshtare.
Konflikti mes Lulzim Bashës dhe ish-kumbarit të tij politik Sali Berisha nisi pasi Basha vendosi përjashtimin e tij nga grupi parlamentar për shkak se Departamenti Amerikan i Shtetit e emërtoi Berishën si person “i përfshirë në korrupsion madhor” duke vendosur sanksione mbi të. Me një veprim dukshëm sfidues ndaj diplomacisë amerikane, Berisha zgjodhi të votojë në një lokal të quajtur “Amerika” që gjendet pranë Ambasadës së SHBA-së në Tiranë në “referendumin” për rrëzimin e Bashës.
Mbështetësit e Bashës iu përgjigjën duke shënjestruar lëvizjen e Berishës si “antiamerikanizëm”.
“Sali Berisha hodhi bazat e një organizatë politike me frymëzim antiamerikan që vetëm me PD-në nuk ka e nuk do të ketë asnjë lidhje kurrë,” shkruhet në rezolutën pro-Bashës.
Të dyja palët akuzuan njëra-tjetrën se përdorin partinë për interesa personale. Sipas mbështetësve të Bashës, lëvizja “Berisha” synon ta kthejë këtë parti në një bunker të interesave të Berishës ndërsa sipas Berishës, Basha e shfrytëzon partinë për interesa personale.
Themeluar në vitin 1991 si partia e parë jokomuniste në Shqipëri, Partia Demokratike u drejtua formalisht dhe në mënyrë indirekte nga Sali Berisha deri në vitin 2013, kur ky i fundit dha dorëheqjen dhe ia kaloi partinë Lulzim Bashës.
Përgjatë tre dekadave të ekzistencës së saj, kjo parti ka njohur grupime të ndryshme të shkëputura, përfshirë Partinë Aleanca Demokratike në fillim të viteve 1990 dhe Partinë e Re Demokratike në fillim të viteve 2000 por ndarja mes Berishës dhe Bashës duket se është më e thella në këtë parti që nga themelimi.
Beteja mes palëve pritet të vijojë në javët në vijim për kontrollin e zyrave, vulave dhe bravave në çdo degë partie e në çdo zyrë. Mbështetësit e Berishës kanë kërkuar në gjykatën e Tiranës, ku regjistrohen vendimet e organeve drejtuese të partive kryesore, regjistrimin e vendimeve për ndryshime në statut si dhe, besohet, vendimin e “referendumit” për shkarkimin e Bashës.
Berisha bëri të ditur se ka ndër mend të vijojë politikën e tij të tensionimit, për të cilën ka qenë i famshëm përgjatë të gjithë karrierës së tij politike, duke shpallur se do të organizojë një miting të mbështetësve të tij ditën e hënë, ditë kur presidenti i Serbisë Aleksandar Vucic do të vizitojë Tiranën.