Kryetarja e komisionit hetimor Jorida Tabaku akuzoi socialistët për bojkot të mbledhjes së radhës, ndërsa nënkryetarja Ermonela Felaj tha se mbledhja u thirr pas mbarimit të sesionit parlamentar.
Partia Demokratike dhe Partia Socialiste janë përfshirë në akuza të ndërsjella për “aferën e inceneratorëve”, pasi dështoi për mungesë kuorumi mbledhja e radhës e komisionit hetimor. Njoftimi për mbledhjen e së mërkurës u publikua në agjendën zyrtare të Kuvendit, por në sallë ishin të pranishëm vetëm anëtarët e opozitës. Kryetarja Jorida Tabaku akuzoi socialistët për bojkot dhe bllokim të hetimit. “PS premtoi që nuk do ketë mbrojtje politike për askënd që është i përfshirë në këtë aferë. Ndërkohë që sot mbrojtja politike po jepet duke bojkotuar mbledhjet e komisionit”- tha Tabaku në një konferencë për shtyp nga Kryesia e Kuvendit.
Socialistët nuk kanë pranuar mbledhjen me argumentin se ka mbaruar sesioni parlamentar për këtë vit. Nënkryetarja e komisionit, Ermonela Felaj, i tha BIRN-it, se caktimi i mbledhjes ishte i njëanshëm. “Sesioni është mbyllur të hënën, 20 dhjetor dhe sipas Rregullores se Kuvendit nuk ka mbledhje te komisioneve në periudhën ndërmjet dy sesioneve”- tha ajo duke shtuar se PD ishte në dijeni të kalendarit të punimeve të Kuvendit. Sipas Felajt, anëtarët e PS-së kanë pritur për të bërë mbledhje që prej datës 7 dhjetor. “Parlamenti nuk mund të rrijë në agjendën e kacafytjeve të PD-së”- shtoi ajo.
Për Tabakun ky argument nuk qëndron pasi edhe komisione të tjera po vijojnë punën pas seancës së fundit plenare të sesionit. Ajo tha se bojkoti i socialistëve pas arrestimit të një ish-ministri bëhet për të mbrojtur personat e tjerë të përfshirë në këtë aferë korruptive.
“Lefter Koka është vetëm fillimi, është vetëm i pari që duhet të shkojë përpara drejtësisë, PS është rreshtuar haptazi në mbrojtje të interesit korruptiv të Lefter Kokës, të Klodian Zotos që është sot në kërkim, të Stela Gugallias që është sot në kërkim dhe të Mirel Mërtirit”- akuzoi ajo.
Tabaku i bëri thirrje SPAK që të shtrijë hetimin edhe tek personat me pushtet.
“Pa bërë drejtësi për të gjithë këta persona, SPAK-u dhe Komisioni Hetimor nuk kanë për ta kryer punën e tyre”- shtoi ajo duke bërë dhe një herë thirrje institucioneve shtetërore dhe private që të japim të dhënat e kërkuara për komisionin hetimor.
Kjo ishte mbledhja e parë e thirrur pas arrestimit nga SPAK të ish-ministrit të Mjedisit Lefter Koka i akuzuar për korrupsion dhe shpërndorim detyre në dhënien e konçensionit për ndërtimin e inceneratorit të Elbasanit.
Komisioni hetimor për aferën e inceneratorëve nuk ka arritur akoma të miratojë një plan hetimor, ndërsa afati i funskionimit është deri me 15 janar 2022, ku i duhet të dalë me një raport gjetjesh për ligjshmërinë e veprimeve të institucioneve shtetërore në dhënien e kontratave koncensionare për impantet e përpunimit të mbetjeve urbane.
