Ministri i Drejtësisë Ulsi Manja mbrojti të hënën në Komisionin e Ligjeve projektligjin “Për disa shtesa dhe ndryshime në ligjin nr. 110/2018 “Për noterinë”. Manja tha se ndryshimet në ligj bëjnë të mundur verifikimin e figurës së kandidatëve për noterë dhe të noterëve në sistem për kontaktet e tyre me elementë të krimit të organizuar, duke marrë masa nëse ka indicie apo prova për këto kontakte.
Ai u shpreh se “Projektligji parashikon ndërhyrjen me masa të shpejta rregullatore për të parandaluar depërtimin e elementëve në konflikt me ligjin në profesionin e noterit si dhe për të adresuar rastet kur pas licencimit të tyre noterët që cënojnë integritetin dhe besueshmërinë”.
“Për kandidatët për noterë do të ketë një filtër integriteti para provimit”- tha ai. Ndërsa, për ata që janë në sistem “do të ketë kontroll periodit çdo vit”- theksoi Manja. Ai argumentoi nevojën e ndryshime në një ligj relativisht të ri me faktyin se ai “nuk parashikonte asnjë instrument që të pengonte bashkëpunëtorët e kriminelëve në profesionin e noterit”.
Por instrumentet e parashikuara nga ministria ngrenë shqetësimin e opozitës se do t'i jepet dorë e lirë ministrit si autoritet për të vendosur për figurën e noterit. Gjithashtu deputetët e opozitës e cilësuan joefikas dhe me standarde të dyfishta këtë verifikim.
Deputeti Gazment Bardhi tha se nuk mund të ketë besueshmëri në një vlerësim për integritet figure kur autoriteti që e bën këtë nuk është verifikuar vetë. “Si mundet që një funksionar publik që nuk e ka kaluar vetë atë standard, ta aplikojë për funksionarët poshtë tij?”- pyeti ai. Duke e cilësuar këtë standard të dyfishtë në vlerësim, Bardhi iu drejtua Manjës duke përdorur një shembull që lidhej me të. “Nëse një kandidat për noter ka kontakt me Ymer Lalën, ti e kalon apo nuk e kalon, sepse ti ke kontakt vetë me këtë. Na ndërhyn Ymer Lala dhe thotë kaloje se ky është miku im”- tha deputeti demokrat.
Ministri i Drejtësisë u mbrojt duke thënë se nuk ka kontakte me botën e krimit. “Nëse dikush nga ju ka prova apo indicie se unë jam në konflikt me ligjin mund t'i paraqisni në organet e drejtësisë”- shtoi ai.
Ndërsa në lidhje me diskrecionin që ka ministri në pezullimin apo heqjen e liçencës së noterëve në ligj, Manja tha se në fakt roli i ministrit është vetëm ekzekutiv, pasi masat i merr bordi disiplinor. “Nuk jam unë si ministër garantisti i këtij procesi, garant është ligji. Janë të gjitha mekanizmat, qoftë për heqjen e licencës së noterit, qoftë për pezullim, e ka ligji këtë”- tha ai.
Nënkryetarja e Komisionit të Ligjeve, Dhurata Çupi, tha se këto ndryshime janë bërë pa marrë parasysh opinionet e Dhomës së Noterisë dhe vëretjet e bëra nga misioni OBDAT. Po ashtu ajo ngriti shqetësimin se kontrolli i ministrisë së Drejtësisë mbi noterët do të përdoret për të futur apo për të nxjerrë nga sistemi njerëz për arsye politike.
Në relacionin shoqërues thuhet se “objektiv i këtij projektligji është që të garantojë integritetin dhe besueshmërinë profesionale të të interesuarit, kandidatit për noter, zëvendësnoterit ose noterit duke kontrolluar dhe duke marrë masat përkatëse kur ka një dyshim të arsyeshëm, të bazuar në indicie, të dhëna ose fakte të besueshme për mbajtjen e kontakteve të papërshtatshme të të interesuarit ose kandidatit për noter me persona të përfshirë në krimin e organizuar ose në kryerjen e veprave të rënda penale, për kryerjen e sjelljeve të rënda të papërshtatshme etike e morale që cenojnë besimin e publikut në sistemin noterial.”
