Ministrja e Financave dhe Ekonomisë, Delina Ibrahimaj pohoi të mërkurën se biznesi i kreut të Federatës Shqiptare të Futbollit, Armando Duka po i nënshtrohej një kontrolli tatimor dhe e quajti ‘rastësi’ nisjen e këtij kontrolli në kulmin e një debati mes Dukës dhe kryetarit të Bashkisë së Tiranës, Erion Veliaj.
E pyetur nga BIRN mbi akuzat për përdorim politik të administratës tatimore në rastin e Dukës, Ibrahimaj tha se biznese të tilla janë në kontroll të vazhdueshëm tatimor për shkak të denoncimeve, por edhe objektivave të administratës për të luftuar informalitetin.
“Në fakt, administrata tatimore funksionon në bazë të ligjeve dhe procedurave tatimore. Rasti në fjalë është rastësi që ndodh pikërisht në këtë moment, pasi vjen në zbatim të një denoncimi dhe një sërë denoncimesh të ardhura, të cilat administrata shtetërore duhet t’i verifikojë brenda një afati 7 ditor,” tha Ibrahimaj.
Gara për zgjedhjen e drejtuesve të shoqatave rajonale të futbollit u kthye ditët e fundit në një përplasje të ashpër mes kryebashkiakut Veliaj dhe kreut të FSHF-së, Duka, i cili po kërkon një mandat të gjashtë.
Përmes një audio përgjimi të publikuar të hënën nga Federata Shqiptare e Futbollit, kryebashkiaku Veliaj akuzohet për ndërhyrje dhe shantazh ndaj anëtarëve të Shoqatës Rajonale të Futbollit Tirana, të cilëve u kërkon mbështetjen e kandidatit të tij në garë.
Veliaj e cilësoi takimin si një “bisedë djemsh” dhe kërkoi të mos nxirrej nga konteksti.
Po të hënën, deputeti Agron Duka u tha mediave se Tatimet mbërritën në ambientet e kompanisë së prodhimit të vezëve ‘AIBA’ në Shkozet, në pronësi të tij dhe të vëllait të tij, Armando Duka, duke e cilësuar kontrollin të qëllimshëm dhe me prapavijë politike.
Përmes një statusi në Facebook, Presidenti Ilir Meta e komentoi deklaratën e ministres Ibrahimaj me nota ironike.
“Domosdoshmëria e çan rrugën përmes rastësisë kemi mësuar dikur në shkollë. Qenka e vërtetë. Apo jo? Ja një provë se si rastësia i ka çarë rrugën domosdoshmërisë,” shkroi Meta.