Me pankarta migjeniane në duar, aktivistet e ”Kolektivit Feminist” në Tiranë protestuan të hënën për kushtet minimale të jetesës të cilat shteti duhet t’u sigurojë familjeve në nevojë.
”Ne i kërkojmë qeverisë miratimin dhe zbatimin e politikave sociale, njohjen e minimumit jetik, si kusht themelor për jetë dinjitoze”, u shpreh aktivistja Gresa Hasa gjatë protestës.
“Ligji këtu funskionin vetëm me të dobëtit”, vijoi ajo, duke iu referuar ndërprerjes së energjisë elektrike nga OSHEE-ja për të moshuarën në Fier.
Ditën e enjte një rast fatal u shënua në Fier, ku një grua e varfër u gjet e pajetë si pasojë e ngrirjes prej të ftohtit pasi asaj iu ndëpre furnizimi me energji elektrike për shkak të detyrimeve të pashlyera.
Kolektivi Feminist, një grup i përbërë nga aktiviste/ë feministe/ë që angazhohet në kultivimin e një shoqërie të barabartë e të lirë, fajësoi shtetin i cili sipas tyre pasuron një grusht oligarkësh dhe përndjek e burgos ato që skamja nuk i lejon të paguajnë energjinë elektrike, apo të kenë mjaftueshëm ushqim në tavolinë.
”Liliana Sema është viktima e radhës e një sistemi socio-ekonomik që prodhon në masë të varfër e më pas i shndërron ata në statistika të padukshme”, u shpreh aktivistja Gresa Hasa.
Sipas Kolektivit energjia elektrike, sikurse strehimi, ushqimi dhe shërbimet shëndetësore janë të drejta themelore.
Aktivistja Xheni Karaj, u shpreh se situata në vitin 2022 për disa familje vijon të jetë e njejtë me kushtet e tridhjetë viteve më parë.
”Me qindra fëmijë po vazhdojnë t’i bëjnë mësimet siç i kemi pas bërë ne në vitet ’90, akoma me qiri”, tha Karaj gjatë fjalës së saj në protestë.
“OSHEE është ndër institucionet më të korruptuara. Shohim një mosbarazi në zbatimin e ligjeve. Shteti nuk vendos asnjë sanksion për punonjësit e korruptuar të këtij institucioni, por vendos dënim me burg për individët me vulnerabël që e kanë të pamundur të paguajnë faturat elektrike”, tha Karaj gjatë fjalës së saj.
Romina Sefa, aktiviste për të drejtat e komunitetit Rom në Shqipëri gjithashtu pohoi se mbi 20 familje rome dhe egjiptiane që jetojnë ne kapanone në zonën e Kavajës po ngrohen me anë të zjarrit.
”Këtë problem e heqin me mijëra familje të varfëra në Shqipëri, një pjesë e tyre kanë në përbërje persona me aftësi të kufizuar”, u shpreh aktivistja Romina Sefa, duke theksuar domosdoshmërinë e ngrohjes për këto individë.
“Kolektivi Feminist” iu bashkua thirrjes që Komisioneri për Mbrojtjen nga Diskrimini gjithashtu bëri të premten për Këshillin e Ministrave për të miratuar sa më shpejt “Statusin e Klientit në Nevojë”, si një e drejtë tashmë e njohur me ligj.
