Kryeprokurori i Bullgarisë, Ivan Geshev, të premten u ankua se nuk ishte informuar për arrestimin e të enjtes mbrëma të ish-kryeministrit Bojko Borissov për mbi 556 milionë leva, e barabartë me rreth 285 milionë euro, që dyshohet se kanë humbur nga buxheti i shtetit.
Së bashku me Borissov, oficerët e policisë bullgare arrestuan ish-ministrin e financave Vladislav Goranov dhe zëdhënësen e partisë GERB të Borissov, Sevdalina Arnaudova.
Arrestimet erdhën menjëherë pasi Kryeprokurorja Evropiane, Laura Kovesi u takua me kryeministrin aktual Kiril Petkov në Sofje më 16 mars për të diskutuar mbi 120 raste të dyshuar korrupsioni dhe shpërdorimi të fondeve evropiane.
Takimi pasqyroi dëshirën e qartë të qeverisë së re për të trajtuar reputacionin e Bullgarisë për korrupsion dhe për të anashkaluar prokurorinë bullgare dhe veçanërisht kryeprokurorin Geshev.
“Aktualisht janë duke u zhvilluar hetime nga Prokuroria Evropiane”, tha të premten kryeministri Petkov.
Qeveria e ka bërë të qartë prej kohësh se dëshiron të heqë qafe prokurorin Geshev, që shihet si mbrojtësi i interesave dhe trashëgimisë së Borissov.
Ministri i Financave Vassilev zbuloi gjithashtu të premten se autoritetet kishin hetuar për një informacion nga oligarku në mërgim dhe ish-bosi i futbollit Vassil Bozhkov, të dhënë në verën e vitit 2021.
Bozhkov u bë një kundërshtar i zëshëm i Borissov dhe partisë së tij GERB pasi biznesi i tij fitimprurës i lotarisë u shtetëzua në fillim të vitit 2020.
Informacioni i tij bëri që Agjencia e Inspektimit Financiar Publik të mblidhte prova për 556 milionë leva që dyshohet se ishin zhdukur nën mbikëqyrjen e Borissov dhe Goranov.
Të premten, Vassilev pretendoi se Prokuroria nën drejtimin e Geshev ishte në dijeni për akuzat kundër Borissov, por kurrë nuk i hetoi ato.
Menko Menkov, avokati mbrojtës i Borissov, të premten tha se ish-kryeministri ende nuk ishte marrë në pyetje për akuzat dhe se e kishte kaluar natën në një qeli.
Akuza për “represion” politik
Ndërsa ministrat e qeverisë duartrokitën arrestimet, anëtarët dhe mbështetësit e ish-partisë qeverisëse të Borissov, GERB, i dënuan ato si arrestime politike dhe si një akt represioni.
“Kemi informacione se po vijnë arrestime të tjera të ish-ministrave. Ne jemi viktima të një junteje”, tha të premten ish-ministri i shëndetësisë dhe anëtar i GERB-it, Kostadin Angelov.
Ministri i financave Vassilev u kundërpërgjigj se seria e arrestimeve dhe rrahjeve të qytetarëve gjatë protestave 2020-2021 kundër qeverisë Borissov ishte akti i vërtetë i represionit.
“Unë nuk ndërhyj në asnjë mënyrë në punën e organeve të rendit. Drejtësia nuk ka triumfuar derisa të ketë një vendim gjykate”, tha të premten presidenti Rumen Radev, një tjetër kundërshtar i njohur i Borissov.
Borissov dhe partia e tij GERB dominuan politikën bullgare nga viti 2008 deri në zgjedhjet e nëntorit 2021, të cilat e çuan GERB-in në opozitë.
Që atëherë, nën një qeveri të re, trashëgimia e Borissov është përballur me kritika në rritje. Vitin e kaluar u formua një komision për të hetuar pretendimet për zhvatje; në 2020 dhe 2022, Borissov u përmend në një skemë pastrimi parash. Ai ka mohuar çdo akuzë.
