Fshati Kepenek, në krahinë e Bytyçit në Tropojë, ishte në zi të shtunën, pasi dy burra banorë të fshatit humbën jetën në një prej galerive të kromit vetëm 1500 metra nga fshati. 41-vjeçari Adil Dautaj dhe 43-vjeçari Afrim Zhutaj u nxorën të vdekur nga një prej galerive të kompanisë Editi-A, pasi një front pune u shemb dhe i zuri poshtë mesditën e të shtunës.
Pasditen e të shtunës, pak kohë pasi grupet e “Avari-Shpëtimit” nxorën nga nëntoka edhe minatorin e dytë, kafeneja në qendër të fshatit u kthye në një vend pritje për ngushëllime. Njëri prej banorëve, një djalë i ri i cili qëndronte jashtë saj për të orientuar njerëzit, thotë se trupat e pa jetë ishin dërguar në morgun e Kukësit.
Ndërkohë në rrugët e shkreta të fshatit nuk është e vështirë të dëgjosh të qarat me zë të lartë të grave nga një prej shtëpive, që siç mësojmë ishte banesa e njërit prej dy minatorëve që humbën jetën në aksident.
Një person që u prezantua si familjarë i njërit prej minatorëve tha se ata ende nuk dinin shumë për ngjarjen. “Nuk mund të japim asnjë koment”, tha ai.
Policia njoftoi se shkaqet e shembjes ishin ende duke u hetuar. Sipas njoftimit ngjarja ndodhi në mesditë. Menjëherë pas shembjes të njoftuara nga kolegët e dy minatorëve grupet e avari-shpëtimit nxorën fillimisht trupin e Adil Dautajt. Afrim Zhutaj që fillimisht u mendua i bllokuar, u nxor nga galeria rreth tre orë më vonë.
“Në vijim të informacionit të dhënë më parë, në lidhje me shembjen e galerisë në fshatin Lajthizë, ku humbi jetën shtetasi A.D, 41 vjeç dhe mbeti i bllokuar në brendësi të galerisë shtetasi A.ZH, ju informojmë se: Nga grupi i Avari-Shpëtimit të Minierave, punonjësit e Policisë dhe minatorët, u bë e mundur nxjerrja e trupit të pajetë të shtetasit A. Zh., 40 vjeç, banues në Kepenek, Tropojë”, thuhet në njoftimin e Drejtorisë Vendore të Policisë së Qarkut Kukës.
Galeria ku ndodhi aksidenti ndodhet vetëm pak minuta larg fshatit. Kur ne mbërritëm, në hyrje ndodhej ende një fugon i policisë dhe dy punonjës të saj. “Galeria është ende një vendngjarje”, na thotë një nga oficerët.
Punonjësi tjetër i policisë, që na shoqëron deri në afërsi të hyrjes, një rrugicë e mbushur me ujë mes dy shkëmbinjve, na paralajmëron: “Mos tento të hysh brenda se do rrezikosh jetën”. Paralajmërimi nuk është aq i nevojshëm. Muret në hyrje të galerisë, që mbahen mbi ca drurë gjysmë të kalbur, të mbërthyer me gozhdë dhe lidhur me kavo, duken mjaftueshëm kërcënues. Boja e tabelave, që paralajmërojnë për kujdes është thuajse e fshirë.
Kompania që menaxhon galerinë që u shemb nuk qe e arritshme për koment.
Drejtuesi teknik i minierës u arrestua të dielën me akuzat për shkelje të rregulave të sigurisë.
“Specialistët e Seksionit për Krimet në Komisariatin e Policisë Tropojë arrestuan në flagrancë për veprën penale “Shkelja e rregullave të mbrojtjes në punë”, shtetasin: A. R., 45 vjeç, banues në Bajram Curri, me detyrë drejtues teknik në subjektin për shfrytëzimin e kromit”, njoftoi policia.
Fshati i vogël në veri të vendin ka pasur disa galeri funksionale dhe para viteve 90. Ka qenë një qendër e gërmimeve për krom në zonë. Banorët thonë se minierat këtu datojnë që prej Luftës së Dytë Botërore. Pas viteve 90’shfrytëzimi i tyre bëhet prej kompanish koncesionare. Aksidente të ngjashme kanë ndodhur edhe më herët. Në vitin 2017 një minator u vra dhe një tjetër u plagos rëndë në minierë.
Në Shqipëri, sipas raporteve të Inspektoratit Shtetëror të Punës, minierat dhe karrierat janë sektori i dytë më i rrezikshëm pas atij të ndërtimit. Mbi 20 minatorë kanë humbur jetën në tre vitet e fundit në miniera apo punë të lidhura me to.
