Konflikti politik në Partinë Demokratike mes dy grupeve kundërshtare është futur në një ngërç ligjor pas një vendimi të marrë të premten nga gjykata e shkallës së parë për njohjen e vendimeve të Kuvendit të 11 dhjetorit.
Ky Kuvend u thirr jashtë strukturave zyrtare të partisë nga grupimi i ish-kryeministrit Sali Berisha, i cili inicioi një betejë kundër pasardhësit të tij Lulzim Basha. Basha e përjashtoi nga partia pasi Berisha u shpall “non grata” nga Departamenti Amerikan i Shtetit.
Gjykata njoftoi se ka pranuar kërkesën e palës kërkuese Partia Domokratike e Shqipërise, përfaqësuar nga Komisioni i Përkohshëm i Rithemelimit të kësaj partie dhe depozitoi vendimet e Kuvendit Kombëtar të datës 11 dhjetor duke rregjistruar ndryshimet përkatëse në regjistrin e partive politike vendimet e marra nga ky Kuvend.
Vendimet kanë të bëjnë me ndryshimin e statutit, logos dhe shkarkimin e gjithë strukturës drejtuese të partisë që nga kryetari Lulzim Basha. Në këtë Kuvend u ngrit një komision rithemelimi, i cili do të çonte partinë në zgjedhje të reja të brendshme për zgjedhjen e strukturave dhe kryetarit të ri. Vendimet nuk u njohën nga Basha, i cili thirri një Kuvend të ri një javë më vonë, më 18 dhjetor.
Vendimi i gjykatës u kontestua nga Enkelejd Alibeaj, kryetar i komanduar i kësaj partie pas dorëheqjes së Lulzim Bashës disa ditë më parë. Ai e cilësoi vendimin e pazbatueshëm dhe paralajmëroi ankimim në apel. Ndërkohë Alibeaj sulmoi gjyqtarin Agron Zhukri duke akuzuar për shpërdorim detyre dhe tha se do të ketë kallëzim penal ndaj tij.
“Nga njohuritë e mia juridike por edhe nga media sesi zhvillohen gjyqet, për mua është një vendim i nivelit të skandalit,” tha ai para mediave. Sipas tij, gjyqtari në tejkalim të ligjit ka marrë shqyrtimin e çështjes pasi “vetë ka deklaruar anësinë e vetë në këtë proces gjyqësor”.
Alibeaj tha se PD ka bërë ankim për regjistrimin e vendimeve të datës 18 dhjetor si Kuvendi i fundit i partisë dhe çështja është në apel, ndërsa e quajti antiligjore seancën e së premtes pa praninë e “palës tjetër”. “Kemi të drejtën për të qenë palë, na e ka mohuar gjykata. Për këtë arsye po bëjmë ankim,” theksoi ai.
Ndërsa përfaqësuesi ligjor i Komisionit të Rithemelimit, Ivi Kaso, i cili foli për mediat para gjykatës, tha se vendimi nuk mund të ankimohet nga pala tjetër. Sipas tij një nga vendimet e regjistruara nga gjykata është dhe anulimi i thirrjes së Kuvendit të 18 dhjetorit. “Ligjërisht nuk ka një Kuvend të thirrur. Vendimi mund të ankimohej vetëm nga ne. Vendimi është i ekzekutueshëm. S’kemi pse bëjmë ankime kot”, tha ai.
Dy Kuvendet e mbajtura në dhjetor zyrtarizuan përçarjen e partisë më të madhe të opozitës, e para parti e krijuar pas rënies së sistemit një-partiak komunist në vitin 1990. Në janar grupi i Berishës organizoi një protestë për marrjen e selisë së partisë duke u përplasur në mënyrë të dhunshme me palën tjetër.
Zgjedhjet e pjesshme lokale treguan se kandidatët e grupit të Berishës arritën të merrnin më shumë vota se kandidatët zyrtarë të PD-së, një situatë që çoi në presionin e deputetëve ndaj Bashës për dorëheqje nga drejtimi i partisë. Deklaratat për bashkim që bëhen nga të dyja palët duken larg veprimeve reale që do të çonte në një bashkim të mundshëm në këtë moment.
