Një pjesë e pusit në minierën e qymyrit Soko u shemb dhe shkaktoi një shpërthim metani, duke lënë tetë minatorë të vdekur dhe të paktën 18 të plagosur të premten.
Sasa Spasiç, drejtor i Ndërmarrjes Publike për Shfrytëzimin e Qymyrit Nëntokësor Resavica, bëri të ditur emrat e të vdekurve, ndërsa numri i minatorëve të lënduar ende nuk është i saktë.
“Sipas informacioneve jozyrtare, ka pasur një shembje në dhomën e gërmimit dhe një depërtim të papritur të metanit në hapësirën e gërmimeve”, tha Spasiç për mediat.
Zorana Mihajloviç, ministrja e minierave dhe energjisë e Serbisë, vizitoi minierën dhe shprehu ngushëllimet e saj për familjet e minatorëve.
“Shteti do t’i ndihmojë këto familje sa më shumë që është e mundur. Ky është një moment i vështirë për të gjithë njerëzit që janë këtu, por edhe për të gjithë ne. Inspektorët, policia dhe të gjitha organet kompetente janë në vend dhe po bëjnë gjithçka që është e nevojshme për të gjetur shkakun e tragjedisë”, tha Mihajloviç.
Sipas televizionit publik të Serbisë, RTS, miniera e Sokos ka një histori ngjarjesh tragjike. Një aksident i madh në vitin 1998 mori 29 jetë. Dhjetë vdiqën nga ekspozimi ndaj nxehtësisë dhe shpërthimit dhe 19 të tjerë u mbytën.
Një shpërthim metani në vitin 1974 vrau 15 minatorë dhe një vit më pas, një shpërthim gazi dhe materialesh vrau pesë minatorë.
