Komisioneri Publik, Darjel Sina u emërua të martën gjyqtar i Gjykatës së Lartë përmes një dekreti të presidentit të Republikës, Ilir Meta. Sina u përzgjodh nga radhët e juristëve të spikatur në një proces që zgjati për më shumë se dy vjet në Këshillin e Lartë Gjyqësor.
Emërimi i Darjel Sinës e çon numrin e anëtarëve të Gjykatës së Lartë në 12 nga 19 gjithsej.
Por bashkë me dekretimin, Meta shprehu rezervat e tij për ato që ai i quajti vonesa të Këshillit të Lartë Gjyqësor në plotësimin e Gjykatës së Lartë.
“Plotësimi i kësaj vakance në Gjykatën e Lartë ka zgjatur ekzaktësisht 2 vjet e 7 muaj, ç’ka tregon se kohëzgjatja e procedurave të ndjekura nga KLGJ është e papranueshme, përtej çdo afati ligjor dhe të arsyeshëm,” thuhet në njoftimin për shtyp të Presidencës.
Sipas njoftimit, presidenti Meta e ka vlerësuar të mirëqenë verifikimin e KLGJ-së ndaj kandidaturës së Sinës dhe e ka dekretuar atë pa vonesë, me vullnetin që Gjykata e Lartë të jetë plotësisht funksionale.
