Kuvendi miratoi të enjten një rezolutë për punën e Institutit të Studimeve për Krimet edhe Pasojat e Komunizmit në Shqipëri, ku i i liheshin 7 rekomandime për t’u përmbushur. Përfaqësues të opozitës e vlerësuan punën e institutit, ndërsa mazhoranca shfaqi kritika kryesisht për rolin në studimet shkencore për periudhën e diktaturës dhe përbërjes së bordit, që siç thuhet në rezolutë ka dy anëtarë në shkelje të ligjit.
Në fund rezoluta e përgatitur nga komisioni i ligjeve u votua nga të dyja palët dhe ISKK-së iu caktuan nga Kuvendi disa detyra për tu përmbushur gjatë këtij viti si; rinovimi i bordit; gjetja e mënyrave për të çuar informacionin tek brezat e rinj, bashkëpunimi me institute kërkimore vendase dhe të huaja, etj..
Kuvendi kërkoi po ashtu rinovimin e marrëveshjen me ministrinë e Arsimit për rritjen e aksesit në shkolla të informacionit për krimet e komunizmit dhe të pasojave të tij dhe krijimin e një baze të dhënash për viktimat e komunizmit.
Drejtori i këtij instituti Çelo Hoxha gjatë prezantimit të punës së tij tha se njohja e të shkuarës vijon të mbetet një problem për tekstet e shkollave, ku ka ndryshime sipërfaqësore për kohën e komunizmit. “Ky ndryshim duhet të jetë rrënjësor”- tha ai.
“Ne nuk merremi me thelbin e çështjes, marrjen e pushtetit nga komunistët që ishte regjim ushtarak në vitet e para. Duke u dhënë historinë korrekte brezave u japim dhe kulturën e shtetit”- shtoi ai duke sjellë si shembull faktin se Partia e Punës kishte pushtetin, po nuk ishte parti elektorale e as politike.
Kryetarja e komisionit të ligjeve, Klotilda Bushka, shpehu rezerva për punën e institutit në aspektin e kërkimit shkencor, qëllim për të cilin është ngritur. “Është e vështirë të kuptojmë sa janë realizuar detyrat në kuadër të thelbit të veprimtarisë”- tha ajo duke shtuar se buxhetet kanë qenë në rritje çdo vit për institutin.
“Në vende të tjera ku ka institucione të tilla ka një përiudhë të kufizuar kohe, janë 32 vjet nga rënia e regjimit komunist dhe ne do të duhet të kemi sot një panoramë të qartë të studimeve të kryera në përmirësimin e fakteve historike”- theksoi ajo duke i kërkuara ISKK-së që të bashkëpunojë me institute të tjera kërkimore-shkencore.
Relatori i rezolutës nga PS, Denis Delili i kërkoi ISKK që “të marrë masa për të ndaluar rastet e papajtueshmërisë së anëtarëve të tij dhe paanësinë e tyre politike” duke iu referuar anëtarëve që mbajnë detyra partiake në Partinë Demokratike.
Deputetët demokratë folën për nevojën e dënimit të krimeve të komunizmit dhe ndryshimin e teksteve shkollore lidhur me këtë periudhë. Dhurata Çupi tha se “studimi i komunizmit pa ndikime politike dhe pa emocione do na bëjë të kuptojmë më mirë atë që ndodhi në diktaturën”. Por sipas saj, “fakti që mbahen të njëjtat diskutime sa herë ka raporte të ngjashme në Kuvend tregon se në Shqipëri nuk është bërë asgjë për dënimet e krimeve të komunizmit”.
Ajo kërkoi që Ministria e Brendshme të vendosë në dispozicion të ISKK arkivën për studime duke krijuar kështu kushtet për një kulturë të kujtesës. “Inkurajoj ISKK që të bëë sa të mundet për të krijuar këtë kulturë të kujtesës dhe ta përçojë tek të rinjtë”.
Puna e ISKK-së ka krijuar debate politike më herët me studimet për krimet e kryera gjatë Luftës së Dytë Botërore dhe socialistët ndryshuan ligjin duke i ndaluar studimet para vitit 1944. Ish-drejtori i këtij instituti, shkrimtari Agron Tufa, u përball me akuza nga disa eksponentë të mazhorancës dhe kërkoi azil jashtë Shqipërisë pasi, sipas tij, kishte marrë kërcënime për jetën për shkak të punës së tij.
