Shtatë deputetë të Partisë Demokratike i kanë kërkuar të mërkurën Kuvendit ngritjen e një komisioni parlamentar të posaçëm me synimin për të hetuar praktikat e ndjekura nga Komiteti për Investimet Strategjike.
Edhe pse nuk do të jetë komision hetimor, synimi sipas firmëtarëve është hetimi i shkeljeve në këto vendime duke marrë shkas dhe nga bërja publike e rasteve kur statusi u është dhënë familjarëve të ministrave apo njerëzve të afërt me pushtetin.
“Qëllimi kryesor është bërja e transparencës publike dhe sigurisht çuarja përpara drejtësisë nëse konstatohen shkelje,” tha deputetja Jorida Tabaku.
Sipas Tabakut do të shqyrtohen të gjitha dosjet e KIS-it dhe do të shikohen vendimmarrjet që kanë krijuar problematika me çështjen e pronësisë.
“KIS ka dhënë vendimmarrje që prekin çështjen e pronës në mënyrë abuzive pa asnjë transparencë,” sqaroi ajo.
Inciativa për të përdorur këtë instrument parlamentar, sipas Tabakut, erdhi pasi ishin refuzuar kërkesat njëpasnjëshme të deputetëve të PD-së për vënien në dispozicion të dosjeve përkatëse për vendimet e KIS-it. Sipas saj arsyeja pse nuk u kërkua komision hetimor kishte të bënte me zgjatjen e procedurave parlamentare.
“Komisioni i posaçëm ka një procedurë më të shkurtër parlamentare dhe ne duam që të fillojë menjëherë hetimi,” tha ajo.
Por fjala hetim nuk është pjesë e objektit zyrtar të komisionit, i cili ka të bëjë më shumë me hartimin e ndryshimeve ligjore dhe hartimin e një ligji të ri që të rregullojë çështjen e investimeve.
Sipas kërkesës zyrtare të dorëzuar në Kuvend objekti i komisionit do të jetë; “shqyrtimi i të gjitha praktikave të deritanishme të ndjekura nga Komiteti i Investimeve Strategjike; hartimi i ndryshimeve ligjore në ligjin nr. 55/2015 “Për Investimet Strategjike në Republikën e Shqipërisë”; dhe shqyrtimi dhe miratimi i projektligjit “Për investimet”.
Duke iu referuar vendimeve të KIS për dhënien e statusit strategjik familjarëve të ministres Olta Xhaçka dhe aktorit Gazmend Paja, anëtar i PS-së në Këshillin Bashkiak të Tiranës, deputetët demokratë argumentojnë se vendimet e dhëna “ngrejnë dyshime të forta për paligjshmëri, korrupsion dhe klientelizëm”