Rama mbajti një konferencë të pazakontë për shtyp nga zyrtat e Partisë Socialiste krahas ministrit të Drejtësisë Ulsi Manja të mërkurën në të cilën u ankua se drejtësia e re po godet vetëm qeverinë e tij dhe jo opozitën, ndërsa mbajti qëndrim sfidues ndaj kritikave të SHBA-së dhe BE-së në lidhje me “presionin” e tij ndaj SPAK.
Komentet e Ramës vijnë pasi dy ish-ministra të qeverisë së tij janë pas hekurave krahas një ish-deputeti dhe disa zyrtarëve të lartë.
“[SPAK] siç po vjen në anën tonë, duhet të shkojë në çdo anë. Nuk duam një drejtësi të pjesshme dhe të njëanshme,” deklaroi Rama.
“…kur ne qepim gojën, kur një grua arrestohet për një arkë peshk, dhe pavarësisht disproporcionalitetit në raport në të tërën, themi, edhe arka e peshkut është shkelje,” deklaroi Rama duke u ankuar për ish-zëvendësministren e brendshme Rovena Voda, e cila u akuzua dhe dënua në shkallë të parë për përvetësimin e 1 mijë eurove, një celulari dhe një arke me peshk nga një aplikante për vend pune nën premtimin e mbështetjes për punësim në shtet.
“Qëndrimi im në Asamblenë Kombëtare të PS-së lidhur me nevojën që SPAK-u të hetojë në mënyrë gjithëpërfshirëse korrupsionin e politikanëve dhe gjykatësve e prokurorëve të korruptuar të cilët si të tillë janë përjashtuar nga procesi i vettingut,” deklaroi Rama duke kërkuar hetimin e tragjedisë së Gërdecit të vitit 2008 apo vrasjen e katër protestuesve në bulevard më 21 janar 2011.
Rama u kritikua nga ambasadorja e SHBA-së Yuri Kim të martën ndërsa zyra e Delegacionit Evropian në Tiranë theksoi “rëndësinë e pavarësisë së prokurorëve” në komente indirekte ndaj kritikave që Rama bëri ndaj SPAK javën e kaluar gjatë Asamblesë së Partisë Socialiste.
Sipas ambasadores Yuri Kim, drejtësia “do të quhet e suksesshme kur të mos mendojmë më se është me vend që udhëheqës politikë në pushtet apo jashtë pushtetit të bëjnë thirrje për ndjekjen penale të këtij apo atij; të thuhet se drejtësia jepet vetëm kur në burg futet tjetri dhe se drejtësi nuk bëhet kur në burg futen të mitë. Kjo nuk është drejtësi; nuk janë këto standardet që duam t’ju ndihmojmë të arrini në Shqipëri. Dhe mendoj se nuk janë këto standardet që populli shqiptar kërkon kur flet për reformë në drejtësi.”
Rama gjithsesi pretendoi se deklarata e tij nuk mund të konsiderohet presion ndaj SPAK përderi sa edhe ndërkombëtarët kanë bërë thirrje për hetimin e korrupsionit.
“Mua nuk më jep leksione askush për ndërhyrje, as shqip, as anglisht, as frengjisht,” deklaroi Rama.
