Metani tha se gjatë vitit të parë puna është bërë me një inspektor dhe ka kërkuar komandimin e magjistratëve të tjerë pranë këshillave. “Nga KLGJ nuk ka pasur asnjë komandim, ndërsa nga ana e KLP-së janë komanduar 4 magjistratë prokurorë. Vetë ILD ka rekrutuar 4 inspektorë jo magjistratë duke e çuar numrin e inspektorëve në total 8, nga 26 që parashikon ligji’- raportoi ai.
“Nevojë imperative për Inspektorin e Lartë të Drejtësisë mbetet plotësimi i njësisë së Inspektorëve me Inspektorë magjistratë, sidomos të profilit gjyqtar dhe për këtë janë të nevojshme ndërhyrjet ligjore”- tha Metani.
Ai i kujtoi deputetëve se ILD ka depozituar që para një viti propozimet për ndryshimet ligjore që kanë të bëjnë me ndryshimin e kritereve të kandidatëve, por Kuvendi nuk i ka futur në axhendë.
“Nevoja e ndryshimeve ligjore mbetet një prioritet për vitin 2022”- theksoi Metani.
Kryetarja e komisionit, Klotilda Bushka, deklaroi se do të merrej parasysh kërkesa, por i kërkoi Metani që të shfrytëzonte ligjin aktual për të zgjedhur inspektorë të rinj. “Do tju inkurajoja që të shfrytëzoni të gjitha mjetet në kuadër të parimeve të funksionalitetit për t’a plotësuar skuadrën, ndërsa për pjesën ligjore ky komision do të ketë rolin e vet proaktiv”- tha ajo.
Ndërsa deputeti Fatmir Xhafa, i cili ka drejtuar komisionin për reformën në drejtësi, ofroi argumentet kundër ndryshimit të kritereve për trupën e inspektorëve, që sipas tij do të ishte me pasoja nesër. “Nuk jam për ulje kriteresh”- tha ai, duke propozuar si zgjidhje shtyrjen e afatit të daljes në pension për gjyqtarët me 3-5 vite për t’i mbajtur në sistem si inspektorë.
“Një zgjidhje që mund ta zbuste dhe nuk kemi pse prekim thelbin e kritereve”- argumentoi Xhafa.
Metani vlerësoi propozimin, duke shtuar se për të do ishte e pranueshme çdo zgjidhje që bënte të mundur funksionimin e plotë të ILD-së.
Në raportimin e tij, Metani i vuri theksin dhe problemeve të bashkëpunimit me Këshillin e Lartë Gjyqësor dhe Këshillin e Lartë të Prokurorisë për çështjen e inspektimeve. “Ankesat që na vijnë nga këshillat shpesh herë janë të shkruara jo sipas standardeve, na duhet kohë t’i kuptojmë”- tha ai.
Ai po ashtu u ankuza se nuk ishte vënë në dijeni të hartës së re gjyqësore dhe se inspektorët nuk kishin akses në sistemin e vendimeve të KLGj-së.
Deputeti Xhafa bëri disa komente në formë kritike për punën dhe rolin e ILD-së në sistemin e drejtësisë dhe ngriti një dyzinë me pyetje për kreun e tij.
“Institucioni është në funksion reaktiv dhe pak në rol proaktiv”- tha Xhafa, duke shtuar se qëllimi pse u krijua inspektoriati ishte që të krijojë besimin tek sistemi i ri i drejtësisë nëpërmjet inspektimit. “Nuk na intereson besimi i publikut tek ILD në vetvete”- shtoi ai, pasi pritshmëritë janë që nëpërmjet punës së ILD të krijohet besueshmëria tek sistemi në tërësi.
Metani tha se ndante të njëjtin mendim për rolin e ILD, por risolli sërish në vëmendje problemin me burimet njerëzore. “Kur nisa punë nuk kisha një karrige ku të ulesha dhe shkoi viti duke kërkuar zyrë”- tha ai, ndërsa e cilësoi sfidën më të madhe rekrutimin e inspektorëve të rinj.
“Kemi qenë proaktivë”- i tha ai Xhafës duke shtuar se “çdo akt inspektimi ka të bëjë me standardet që vendosen për të mos shkelur balancën në sistem”.
Pyetjes nëse ndihej nën presion apo i kërcënuar nga politika Metani iu përgjigj “jo”. Kritikat apo deklaratat politike ai i cilësoi si “probleme të demokracisë”. “S’ka pavarësi të gjyqësorit nëse nuk funksionon demokracia, si dhe e kundërta”- tha ai.
Sipas statistikave në ILD janë depozituar më shumë se 4000 ankesa, kryesisht nga qytetarët dhe këshillat, ku përfshihen dhe ankesa të mbartura nga Këshilli i Lartë i Drejtësisë.
