Komisioni i Pavarur i Kualifikimit zhvilloi të martën seancën e dytë dëgjimore me prokurorin e Durrësit, Bledar Bejko, pasi kishte njoftuar më 4 prill riçeljen e hetimit administrativ për të.
Brunilda Bekteshi, relatore e trupës së kryesuar nga Pamela Qirko, me anëtar Olsi Komicin, lexoi se KPK kishte hetuar ndër të tjera disa transaksione të kryera nga bashkëshortja e prokurorit në emër të të afërmve të tij, përfshi një shumë prej 5.8 milionë lekë të hedhura në llogarinë e babait të Bejkos në disa pjesë nga viti 2004 e në vijim.
Siç doli në seancë, bashkëshortja e Bejkos punonte në atë kohë në një degë banke. Sipas relatimit dhe shpjegimeve, në kohën e transaksioneve ajo ishte e lidhur me prokurorin, por bashkëjetesa e tyre bazuar në deklarimet e vetë Bejkos ishte e disa viteve më vonë.
Bekteshi në relatim tha se Bejkos i ishte kaluar barrë prove për të dokumentuar bindshëm burimin e krijimit të këtyre parave. Në pyetje, kryesuesja Pamela Qirko ngriti dyshime se këto para mund të ishin të bashkëshortes apo të prokurorit dhe këmbënguli për prova që të tregonin se ato ishin para të prindërve.
Bejko dhe mbrojtësja e tij, Antoneta Sevdari thanë se babai i subjektit, poeti Sadik Bejko kishte pasur të ardhura të mjaftueshme për të krijuar kursimet që kishin shërbyer për këto transferta.
Sevdari tha se nga analiza financiare që kishte bërë Komisioni deri në vitin 2004, Bejko kishte pasur mundësi të kursente 4.2 milionë lekë dhe sipas saj me të ardhurat e provuara mbi këtë analizë rezultonte me një bilanc pozitiv prej 2 milionë lekësh. Ajo shtoi se analiza e bërë prej Bejkos nxirrte një bilanc edhe më pozitiv dhe i kërkoi KPK të rishikonte shpenzimet për periudhën para vitit 2004, bazuar në një vendim të Kolegjit të Posaçëm të Apelimit.
E pyetur nga Qirko mbi kohën e krijimit të këtyre të ardhurave, Sevdari tha në seancë se Bejko ishte një poet i njohur dhe kishte pasur të ardhura për shumë vite, por sqaroi se duke mos qenë subjekt deklarues, nuk kishte për të një analizë kaq të detajuar.
Vetë prokurori pranoi në seancë se bashkëshortja i kishte kryer këto veprime për të lehtësuar procedurat bankare për të afërmit dhe po ashtu kishte kryer veprime të tjera për të siguruar arritjen e kërkesave të vëna nga banka e të ngjashme.
Më herët në seancën dëgjimore të zhvilluar më 28 mars, Bejko dha shpjegime për të tre kriteret e rivlerësimit, ku më së shumti u ndal në gjetjet dhe barrën e provës për pasurinë dhe profesionalizmin. Në seancë u relatua balancë negative në shumën 1.8 milionë lekë për një apartament në Tiranë. Bejko e kundërshtoi këtë konstatim, duke kërkuar që analiza financiare të bazohej në deklarimin e vitit 2008 kur ai kishte kryer transaksionin, si dhe të përfshihej vlera 57 mijë euro që i është dhënë prej prindërve të tij – shumë për të cilën tha se kishte provuar burimet e ligjshme.
Në të dy seancat ai ka kërkuar konfirmimin në detyrë. Trupa bëri me dije se vendimi do të njoftohej më 26 maj në orën 9.45.
