Ai dha dorëheqjen nga funksioni dhe gradat ushtarake vetëm pak orë para zhvillimit të seancës plenare ku me 78 vota pro, 4 kundër dhe 1 abstenim u zgjodh presidenti i ri i vendit.
Opozita e kontestoi procesin e zgjedhjes së tij si antikushtetues dhe braktisi votimin. Vetëm 6 deputetë të partive të vogla të opozitës, 4 të Lëvizjes Socialiste për Integrim, e cila kishte deklaruar votën kundër, dhe 2 të Partisë për Drejtësi dhe Unitet, morën pjesë në proces.
Duket se një votë pro ka ardhur nga radhët e deputetëve opozitare, pasi mazhoranca numëron 77 deputetë në radhët e saj 74 nga Partia Socialiste dhe 3 deputetë të Partisë Social-Demokrate të drejtuar nga Tom Doshi.
Zgjedhja e tij krijoi një ngërç ligjor pasi ushtarakëve nuk u lejohet të zgjidhen në detyra publike të tjera kur janë në shërbim aktiv. Dekreti i lirimit nga detyra për Begajn, u firmos nga presidenti në detyrë, Ilir Meta, në Stamboll, ku ai ndodhej për vizitë, pas depozitimit të kandidaturës së tij në Kuvend.
Ky akt u cilësua antiligjor nga Partia Demokratike. Dekreti u publikua në faqen e Presidencës dhe u referua në raportin e Komisionit të Ligjeve, por deputeti Oerd Bylykbashi në këtë komision konstatoi mungesën e kopjes fizike të dokumentit.
Ndërsa kryetari i Partisë Demokratike Sali Berisha e cilësoi një precedent të rrezikshëm për demokracinë zgjedhjen e Begajt, duke e konsideruar atë një ushtarak aktiv në momentin e zgjedhjes.
“Nuk ndodh në asnjë vend të botës së vendeve të lira që nga karrigia e shefit të shtabit të ushtrisë të kalojë në karrigen e presidentit. Kjo ndodh vetëm në junta ushtarake. Me këtë precedent mund të ndodhë grusht shteti”-tha Berisha jashtë sallës së Kuvendit. “Presidenti kur udhëton atributet e tij i merr kryetari i Kuvendit”- komentoi ai dekretin e Metës.
Berisha dhe deputetët e tij u larguan nga salla duke bojkotuar votimin, ndërsa pjesa tjetër e grupit të PD-së kishte deklaruar bojkotin e seancës duke akuzuar mazhorancën për një proces të njëanshëm në zgjedhjen e kreut të shtetit.
Kryeministri Edi Rama i cilësoi kontestimet “muhabete që nuk kanë lidhje fare” me zgjedhjen e presidentit. “E rëndësishme është që Shqipëria pas një periudhe dramatike në zyrën e Kreut të Shtetit, do të ketë një president normal”- tha ai pas seancës.
Sipas kryeministrit, Begaj, “është një figurë e identifikueshme me qytetarin shqiptar, dinjitoz dhe të respektueshëm, me njeriun besnik ndaj vendit e detyrës, me shembullin e një burri të qetë, të arsyeshëm, normal”.
Begaj ishte i pranishëm në llozhën e Kuvendit dhe u përshëndet nga kryeministri Edi Rama dhe deputetët socialistë. Ai vjen nga një karrierë e gjatë në Forcat e Armatosura megjithëse në profesion është mjek.
Presidenti i ri u zgjodh në raundin e katërt të votimit që kërkonte shumicë të thjeshtë votash, ndërsa tre raundet e para që impononin një emër konsensual me shumicë të cilësuar u dogjën pa asnjë kandidat zyrtar.
