Gjyqtari i procedurës paraprake në Dhomat e Specializuara të Kosovës, Nicolas Guillou, vendosi të enjten që Hashim Thaçi dhe Kadri Veseli duhet të qëndrojnë në paraburgim përpara gjykimit të tyre për krime lufte dhe krime kundër njerëzimit që dyshohet se janë kryer gjatë konfliktit të viteve 1998-1999 në Kosovë.
Gjykatësi Guillou hodhi poshtë një kërkesë të mbrojtjes për lirimin e Thaçit dhe Veselit, të cilët ishin dy nga udhëheqësit e kohës së luftës të Ushtrisë Çlirimtare të Kosovës, UÇK. Dy burrat kanë rreth një vit e gjysmë që ndodhen në paraburgim, që nga nëntori i vitit 2020.
Gjykatësi Guillou arriti në përfundimin se “rreziqet që z. Thaçi (dhe z. Veseli) të arratisen, të pengojnë progresin e procedurave të Dhomave të Specializuara, ose të kryejnë krime të mëtejshme kundër atyre që perceptohen si kundërshtarë të UÇK-së, duke përfshirë dëshmitarët që kanë dhënë ose mund të sigurojnë prova në çështje dhe/ose duhet të paraqiten në Dhomat e Specializuara, vazhdojnë të ekzistojnë”.
E ashtuquajtura Gjykata Speciale vendosi se arresti shtëpiak gjithashtu nuk mund të merret në kosnideratë për shkak se Thaçi dhe Veseli kanë autoritet të rëndësishëm në Kosovë dhe për shkak se ekipet e tyre mbrojtëse nuk kanë paraqitur argumente të reja në kërkesat e tyre të fundit për lirimin e tyre.
“Gjyqtari i procedurës paraprake më tej kujton se ai gjeti se provat zbulojnë se gjatë kohës që z. Veseli ishte në krye të SHIK-ut (Agjencisë së Kosovës për Inteligjencë), anëtarët e SHIK-ut ishin të përfshirë në ndërhyrje të dëshmitarëve”, tha gjyqtari Guillou, duke shpjeguar rrezikun e manipulimit të dëshmitarëve nëse Veseli lirohej nga paraburgimi.
Thaçi ishte drejtor politik i UÇK-së dhe u bë president i Kosovës në periudhën e pasluftës, ndërsa Veseli ishte shef i shërbimit informativ të UÇK-së dhe më vonë u bë kryetar i Kuvendit. Ai ishte kryetari i Partisë Demokratike të Kosovës, PDK, në kohën e arrestimit.
Dy burrat janë në pritje të gjykimit për akuzat për krime lufte së bashku me dy ish-bashkëluftëtarë të tyre, gjithashtu figura të rëndësishme politike në Kosovë – kreun e grupit parlamentar të partisë opozitare Lëvizja Vetëvendosje, Rexhep Selimi, dhe kryetarin këshillit kombëtar të partisë Nisma Socialdemokrate (NISMA), Jakup Krasniqi.
Thaçi, Veseli, Selimi dhe Krasniqi akuzohen se janë përgjegjës për krimet e kryera nga ata dhe ish-pjesëtarët e tjerë të UÇK-së në pjesë të ndryshme të Kosovës por edhe në veri të Shqipërisë kundër qindra civilëve dhe joluftëtarëve.
Shumica e krimeve janë kryer në qendrat e paraburgimit në 17 komuna në Kosovë dhe dy rrethe të Shqipërisë, Kukës dhe Has.
Dhomat e Specializuara të Kosovës u krijuan për të gjykuar krimet që dyshohet se janë kryer gjatë dhe menjëherë pas luftës së Kosovës nga viti 1998 deri në vitin 2000. Ato janë pjesë e sistemit gjyqësor të Kosovës, por të vendosura në Holandë dhe me personel ndërkombëtar.
Ato u krijuan nën presionin e aleatëve perëndimorë të Kosovës, të cilët druheshin se sistemi i drejtësisë së Kosovës nuk ishte mjaftueshëm i fuqishëm për të gjykuar rastet e UÇK-së dhe për të mbrojtur dëshmitarët nga ndërhyrja.
E ashtuquajtura “Gjykatë speciale” nuk shihet me sy të mirë nga shqiptarët e Kosovës, të cilët e shohin atë si një fyerje për luftën e UÇK-së për çlirim nga sundimi serb.
