Ambasadori i Gjermanisë në Tiranë Peter Zingraf nuk e fshehu dot pesimizmin në lidhje me situatën e korrupsionit dhe mungesës së transparencës në prokurimet publike në Shqipëri, gjatë prezantimit të rezultateve të një sondazhi mbi gjendjen ekonomike të Shqipërisë, të kryer nga Dhoma Gjermane e Industrisë dhe Tregtisë me anëtarët e vet, një sondazh që raportoi një përmirësim të dukshëm të vlerësimit të situatës ekonomike në krahasim me dy vitet e fundit, vitet e pandemisë.
“Është frustrues problemi i korrupsionit, të cilin e kam dëgjuar që kur kam ardhur [në Shqipëri]”, tha Zingraff para gazetarëve të mërkurën.
Në sondazh, kompanitë pjesëmarrëse pyeten se si i vlerësojnë problematikat në 20 fusha të ndryshme, nga produktiviteti dhe cilësia e punonjësve (gjermanët kanë vlerësim të lartë për punonjësit shqiptarë në këtë drejtim) te administrata publike, stabiliteti politik apo korrupsioni. Nuk ishte surprizë fakti që, në vlerësimin nga 1 në 6, ku 1 është “shumë mirë” dhe 6 është “shumë keq”, opinioni më negativ iu rezervua fushave “lufta kundër korrupsionit dhe kriminalitetit”, “transparenca e tenderëve publikë” dhe “siguria ligjore”. E vërtetë, bizneset vërejnë një përmirësim në këto fusha këtë vit, në krahasim me vitin e kaluar ku lufta kundër korrupsionit vlerësohet me “përmirësim mesatar” ndërsa transparenca e tenderëve “me përmirësim të lehtë”.
Rezultatet e vrojtimit të këtij viti vënë në pah shqetësimin mes kompanive për largimin e punëtorëve në emigrim.
“Shqipëria nuk do të jetë edhe për shumë kohë vendi ku mund të bësh biznes me paga të ulëta”, thekson raporti.
Pyetjes “Si e shihni zhvillimin e tregut të punës në Shqipëri?” 73% e të anketuarve i janë përgjigjur se intensiteti i emigrimit do të rritet, 18% vlerësojnë se volumi aktual i emigrimit do të ulet në një të ardhme të afërt. 4,5% argumentojnë se puna e kualifikuar do të shoqërohet me rritje pagash, ndërsa 4,5% argumentojnë se do të jetë i lartë qarkullimi i punonjësve. Me sa duket, shkalla e lartë e emigrimit po e bën gjithnjë e më të vështirë gjetjen e forcave të punës, aq më pak me kosto të ulëta, nënvijëzohet në raport.
Presidentja e DIHA-s, znj. Stephanie Sieg-Farka u shpreh në fjalën e saj përshëndetëse se pandemia ka shkaktuar humbje të mëdha për disa kompani dhe disa prej tyre madje u është dashur të mbyllin veprimtarinë e tyre. Është e kuptueshme që ekonomia nuk mund të rimëkëmbet menjëherë, veçanërisht pas sfidave dhe vështirësive të reja që i sjell ekonomisë lufta në Ukrainë. Megjithatë ajo theksoi se perspektivat e biznesit për të ardhmen janë përmirësuar nga viti i kaluar, por emigracioni i fuqisë punëtore po shkakton vështirësi.
Megjithatë, për ambasadorin Zingraf, problemi më i madh duket se qëndron te korrupsioni më shumë se sa te krizat ekonomike të përsëritura.
“Lufta ndaj korrupsionit, shteti i së drejtës dhe transparenca mbeten qendrore nëse ne duam të shfrytëzojmë tërësisht potencialin e marrëdhënieve ekonomike gjermano-shqiptare. Ato janë vendimtare për klimën e përgjithshme të investimeve, për zhvillimin ekonomik të vendit si dhe për procesin e integrimit evropian. Sikurse e dini, në këtë rrugëtim ju mund të besoni në mbështetjen e plotë të Gjermanisë”, deklaroi ai.
