Grupi parlamentar i Partisë Demokratike lajmëroi të hënën se kishte dorëzuar në Kuvend një mocion për “konstatimin e pavlefshmërinë dhe mbarimin e mandatit të deputetes Olta Xhaçka”.
Sipas kërkesës, Xhaçka, aktualisht ministre për Europën dhe Punët e Jashtme në qeverinë “Rama” ka përfituar drejtpërdrejt të mira publike nëpërmjet vendimeve të Komitetit të Investimeve Strategjike në favor të kompanive në zotërim të bashkëshortit të saj, ish-deputetit socialist, Artan Gaçi dhe familjarëve të tjerë të ministres.
Kërkesa është firmosur nga 14 deputetë të kësaj partie dhe i referohet neneve kushtetuese që ndalojnë deputetin që të përfitojë të mira publike.
“Dhënia e pasurisë publike për qëllime fitimi dhe ushtrimi të veprimtarive fitimprurëse është bërë në shkelje flagrante të ndalimeve kushtetuese dhe ligjore, që ndalojnë deputetin dhe për efekt të ligjit bashkëshortin e tij, të përfitojë pasuri të shtetit apo të kryejë veprimtari fitimprurëse që burojnë nga pasuritë e shtetit. Ky fakt përbën shkelje të rëndë të ligjit, që passjell mbarimin/pavlefshmërinë e mandatit të deputetit, sipas neneve 70/2-3 dhe 71/2/c të Kushtetutës,” thuhet në kërkesën e PD.
Deputetët e PD-së arsyetojnë se bazuar në ligjin nr. 9367/2005 për konfliktin e interesit provohet se deputetja Xhaçka ka kryer veprimtari fitimprurëse që burojnë nga pasuria e shtetit.
“Ligji nr. 9367/2005 parashikon shprehimisht në nenin 35 të tij se “në rast se aksionet apo pjesët në kapital janë të regjistruara në emrin e personit të lidhur (që sipas ligjit është bashkëshorti), ato vlerësohen njëlloj si të ishin të regjistruara në emër të vetë zyrtarit,” argumentojnë deputetët e PD.
“Për pasojë, përfitimet nga pasuria e shtetit që burojnë nga vendimi nr. 3/5, datë 29/03/2021 “Për miratimin e statusit “investim/investitor strategjik procedurë e asistuar” për projektin e investimit “DREAMADES LUXURY SUITES”, janë përfitime të ministres dhe deputetes znj. Olta Xhaçka,” shtohet në kërkesë.
Deputetët kërkojnë mbledhjen urgjente të Këshillit të Rregullores dhe Mandateve, i cili vendos për dërgimin e kërkesës në Gjykatën Kushtetuese. Në kërkesën e tyre, deputetët e Partisë Demokratike citojnë dy precedentë të mëparshëm, ku Gjykata Kushtetuese vendosi papajtueshmërinë dhe heqjen e mandatit për Ilir Beqjen dhe Koço Kokëdhimën.
Mocioni për heqjen e mandatit u dorëzua vetëm disa orë pasi Konferenca e Kryetarëve rrëzoi me votat e mazhorancës një kërkesë të dytë të 35 deputetëve të Partisë Demokratike për ngritjen e një komisioni hetimor parlamentar për investimet strategjike.
Kreu i grupit parlamentar të PS-së, Taulant Balla, tha në një dalje për mediat se kërkesa u rrëzua pasi nuk plotësonte kriteret kushtetuese. “Konferenca e Kryetarëve në shumicë konstatoi se kërkesa e PD ka probleme të qasjes kushtetuese të kërkesës së deputetëve, kërkesa nuk ka një mbështetje në vendimmarrjet e Gjykatës Kushettuese, e cila ka sqaruar rastet kur ngrihen këto komisione, nuk kërkohet hetim i një çështjeje të veçantë dhe mungojnë indiciet që justifikojnë një komisioni të tillë”- tha ai.
Kryetari i grupit parlamentar të PD-së, Enkelejd Alibeaj e cilësoi vendimin një “aferë korruptive. “U shkel kushtetuta për rrëzimin e kërkesës për ngritjen e komisionit hetimor,” tha ai.
Më herët, PS e kishte rrëzuar 2 herë radhazi një kërkesë të tillë me pretendime formale.
Çështja “Xhaçka” u denoncua të hënën në një konferencë për mediat edhe nga selia e PD-së. Deputeti Agron Shehaj, pjesë e grupimit të ish-kryeministrit Sali Berisha, po ashtu paralajmëroi se do të ketë një nismë ligjore për heqjen mandatit të deputetes.
