Komisioni i Ligjeve miratoi të mërkurën me kundërshtimin e opozitës projektin e qeverisë “Për krijimin dhe funksionimin e parqeve teknologjike dhe shkencore”, që parashikon lehtësira fiskale dhe administrative, dhënien e tokës apo aseteve publike në përdorim.
Projektligji, i ngjashëm me atë të “investimeve strategjike’, parashikon lehtësira administrative për kompanitë që aplikojnë si zhvillues të këtyre parqeve dhe dhënien e tokës publike në përdorim mbi 20 vite.
“Institucionet, entet dhe autoritetet publike trajtojnë kërkesat për leje dhe licenca nga zhvilluesi ose përdoruesi brenda 15 ditësh pune nga dorëzimi i kërkesës, sipas lehtësirave të ngjashme rregullatore të përcaktuara në ligjin nr.55/2015, “Për investimet strategjike””- thuhet në draftin e qeverisë.
Në lehtësirat fiskale parashikojnë zero tatim-fitim për 15 vite, zero taksa për pagat e personelit për një periudhë 10-vjeçare; përjashtim nga TVSH-ja mallrat, pajisjet dhe shërbimet e përdorura në park, të cilat do të shërbejnë për nxjerrjen e “produktit inovativ”; përjashtim nga taksa e ndikimit në infrastructure dhe taksa e pasurisë së paluajtshme për një periudhë 10-vjeçare, si dhe rimburisim të kostove të trajnimit të stafit.
Deputetët e opozitës e kontestuan projektin dhe ngritën pikpyetje për zbatimin e tij duke e krahasuar me problematikat që lidhen me ligjin “për investimet strategjike”.
Enkelejd Alibeaj i quajti tekno-parqet “oaze me lehtësi fiskale” që mund të krijojë hapësira që të përfitojnë kompanitë e lidhura me pushtetin.
“A po hapim një mundësi tjetër për të futur në oaze fiskale biznese të lidhura me qeverinë? Çfarë garancish jep ligji se nuk do të krijohet një sferë korruptive ashtu siç ka krijuar ligji për investimet strategjike?”- pyeti ai përfaqësuesit e qeverisë.
Alibeaj e quajti ligjin si rastin tipit të “korrupsionit legjislativ”. “Të gjitha skandalet korruptive e kanë zanafillën tek këto lloj ligjesh”- tha ai duke kërkuar që projekti të rrëzohej pasi ishte antikushtetues dhe një “portë për të favorizuar biznesin politik”.
Edhe për Oerd Bylykbashin ligji në dukje mbështet mendjet inovative, por në të vërtetë do të shërbejë vetëm për disa individë që të marrin në pronësi tokën publike. “Kjo s’është për shumicën e njerëzve që kanë ide brilante. Në dukje është për mendje, por ligji e ka pikën e gravitetit në asete solide të vjetra”- tha ai. Sipas tij, ligji do të shërbejë që kompanitë zhvilluese pas 20 vitesh të mbajnë pronën që u ka dhënë shteti.
Zv/ministri i Financave Besart Kadia tha se “këto lehtësira jepen sepse ky sektor nuk është i zhvilluar” dhe sipas tij kompanitë që investojnë kanë risk të lartë.
Drejtori i Përgjithshëm i Koorporates se Investimeve Shqiptare, Ermal Frashëri, mbrojti projektin duke e krahasuar atë me masa të ngjashme që jepen në vende të tjera për këto lloja investimesh.
“Kjo ndodh rëndom, ku investimet në kërkim-zhvillim marrin lehtësira”- tha ai. Ndërsa dhënia e pronave publike në përdorim, sipas Frashërit, do të shërbejnë si “ekosistem” për të tërhequr kompanitë që investojnë në këtë fushë.
Deputetët e mazhorancës e mbrojtën projektin si nxitje të teknologjisë së inovacionit dhe i quajtën “paragjykuese” komentet e kolegëve të opozitës.
“Ka një brez të ri shumë të interesuar për këto investime, s’kemi pse e sofistikojmë situatën sikur këtu do të mbyllet hashash”- tha deputeti i PS-së, Pandeli Majko.