Gjykata e Posaçme e Shkallës së Parë për Korrupsionin dhe Krimin e Organizuar rrëzoi të enjten më 7 qershor kërkesën e SPAK për pushimin e një procedimi penal për “fshehje pasurie” ndaj shtatë ish-gjyqtarëve të Gjykatës së Lartë dhe të Gjykatës Kushtetuese, të cilët u larguan nga sistemi i drejtësisë përmes vetingut ose dorëheqjeve.
Hetimi ndaj shtatë ish-zyrtarëve të lartë të drejtësisë nisi në prill 2020 pas një kallëzimi të dorëzuar në Prokurorinë e Posaçme Kundër Korrupsionit dhe Krimit të Organizuar, SPAK në adresë të 20 magjistratëve të niveleve të ndryshme, të cilët akuzoheshin për vepra penale që lidheshin me evazionin fiskal dhe fshehjen e pasurisë. Një referim i dytë me emra ish-gjyqtarësh u dërgua në SPAK nga policia gjyqësore. Materiali kallëzues u nda dhe çështjet për 10 magjistratë u dërguan për kompetencë në prokuroritë e Tiranës, Durrësit dhe Elbasanit.
Me vendimin e datës 30 dhjetor 2021, prokurorja Doloreza Musabelliu kërkoi pushimin e procedimit penal për ish-kreun e Gjykatës së Lartë, Xhezair Zaganjori dhe ish-gjyqtarët Aleksandër Muskaj, Artan Zeneli, Besnik Imeraj, Edmond Islamaj, Gani Dizdari dhe Tom Ndreca. Në kërkesën për pushim, Musabelliu argumentonte se, megjithëse konstatohen pasaktësi të natyrës administrative në plotësimin e deklaratës “veting” të pasurisë, ato nuk përmbajnë elementë të veprës penale të parashikuar nga neni 257/2 i Kodit Penal, në kuadër të deklarimit të rremë apo të fshehjes së pasurisë.
Kërkesa e SPAK nuk u pranua të mërkurën nga gjyqtari Erjon Bani, i cili ka konstatuar mungesë të hetimeve në harmoni me prakitkën e deritanishme të Gjykatës së Posaçme për subjekte dhe raste të ngjashme.
“Gjykata riktheu aktet për hetime të mëtejshme,” sqaroi për BIRN, koordinatorja për të drejtën e informimit në Gjykatën e Posaçme të Shkallës së Parë, Dinora Aleksi.
Në gusht 2021, SPAK dërgoi për gjykim ish-kreun e Gjykatës Kushtetuese, Bashkim Dedja dhe ish-gjyqtarin Fatos Lulo, të cilët akuzohen për “fshehje pasurie”. Por, në tetor të vitit të kaluar, Gjykata e ktheu mbrapsht çështjen e Bashkim Dedjes për ‘hetime të paplota'.
Ish-kryetari i Gjykatës së Lartë, Xhezair Zaganjori u shkarkua nga Kolegji i Posaçëm i Apelimit më 16 korrik 2019, pasi nuk arriti të provojë mbulimin me burime të ligjshme për 4 pasuri të patundshme në Tiranë, se kishte deklarim të pasaktë të burimit të blerjes së një apartamenti në Durrës si dhe mungesë dokumentimi të pagesës së tatimeve për të ardhurat e përfituara nga qiratë në vitet 1999-2007. Bazuar në ankimin e Komisionerit Publik Florian Ballhysa, Kolegji mori në shqyrtim termin “evazion fiskal i ligjshëm” i përdorur nga Komisioni i Pavarur i Kualifikimit në vendimarrjen për konfirmimin e Zaganjorit.
Ish-gjyqtari i Gjykatës Kushtetuese, Besnik Imeraj dha dorëheqjen më 31 janar 2018 për “arsye shëndetësore dhe personale”, por u referua në prokurori nga Komisioni i Pavarur i Kualifikimit.
Kolegu i Imerajt, Gani Dizdari u shkarkua nga detyra për shkak të kontakteve të papërshtatshme me nipin e tij të dënuar si dhe për mosjustifikimin e pasurisë së personave të lidhur.
Sipas Kolegjit të Posaçëm të Apelimit, ish-anëtari i Gjykatës së Lartë, Edmond Islamaj u shkarkua pasi nuk pasqyroi 4.1 milionë lekë kursime në deklaratën “veting” për të shmangur kontrollin mbi burimin e tyre.
Ndërsa për ish-anëtarin tjetër të Gjykatës së Lartë, Tom Ndreca, procesi i rivlerësimit nxorri në dritë mosdeklarim të pasurisë si dhe problemet e kunatit me ligjin. Ish-anëtari tjetër i Gjykatës së Lartë, Artan Zeneli u shkarkua për mosdeklarimin e heqjes së vizës nga ambasada e SHBA-së; mosdeklarim të huave nga persona të ndryshëm dhe probleme të tjera në blerjen e pasurive të paluajtshme.
Ndërsa Aleksandër Muskaj u largua me dorëheqje nga sistemi i drejtësisë së bashku me katër anëtarë të tjerë të Gjykatës së Lartë.