Komisioneri për Mbrojtjen nga Diskriminimi, KMD prezantoi të mërkurën planin e ri strategjik për vitin 2022-2026, në praninë e institucioneve të tjera të pavaruara publike, partnerëve ndërkombëtarë dhe aktorëve të shoqërisë civile. Ky plan ka rishtazi si qëllim kryesor zbatimin e ligjit në fushën e mosdiskriminimit dhe barazisë gjinore në Shqipëri.
“Të gjithë jemi të prekshëm nga diskriminimi, prandaj të gjithë duhet të luftojmë në parandalimin e tij,” tha komisioneri Robert Gajda gjatë fjalës së tij.
Institucioni i KMD-së tashmë është aktiv prej 12 vitesh në mbrojtje të të drejtave të njeriut në Shqipëri. Plani strategjik për katër vitet e ardhshme është hartuar nga Komisioneri për Mbrojtjen nga Diskriminimi, dhe mbështetur prej Këshillit të Europës dhe Delegacionit të Bashkimit Europian në Shqipëri.
Në thelb të planit të ri strategjik të KMD-së do të jenë monitorimi dhe analiza e planeve të tjera të qeverisë, për të shtyrë në zbatimin konkret të tyre dhe jo thjesht mjaftimin me një formulim abstrakt të planeve në letër.
“Monitorimi është proces tepër i rëndësishëm për të parë trendet dhe shkaqet se nga vjen diskriminimi”, tha komisioneri Gajda.
Një tjetër risi e këtij planit strategjik do të jenë dhe paditë kolektive, si një formë “presioni” ndaj institucioneve për të zbatuar praktikat kundra diskriminimit të çdo lloj forme.
“Paditë për interesat kolektivë do të jenë një shtysë për përballjen me diskriminimin e strukturuar,” shtoi ai.
“Ne gjithashtu do vijojmë punën për t’i shtyrë institucionet në zbatimet e disa VKM-ve shumë të mirëhartuara, por të pazbatuara,” tha Gajda.
Sipas komisionerit, sfida kryesore e institucionit që ai përfaqëson konsiston në dhënien e sa më shumë argumentave për rastet apo vendimet, shumica e të cilave shkojnë deri në Gjykatë. Ai shtoi gjithashtu se ndërgjegjësimi i institucioneve publike dhe atyre private mbetet faktori kyç në luftën kundër diskriminimit.
Roli i insituticionit të KMD-së pasqyrohet dhe në rritjen e shkallës së raportimeve, gjë e cila tregon besueshmërine e shtuar të qytetarëve në këtë institucion.
“Një rritje me 50% e gjeografisë së rasteve të raportuara dhe të trajtuara me sukses”, tregojnë të dhënat e analizës nga plani strategjik i kaluar.
Gajda theksoi se një tjetër iniciativë që planifikohet të merret në katër vitet e ardhshme do të jetë edhe përpjekja për konkretizimin e ligjit për barazinë gjinore. Gajda përfundoi duke cilësuar se përpjekjet e KMD-së do të shtrihen edhe në fushën e arsimit, mbi edukimin e rinisë që në moshë të hershme me frymën anti-diskriminuese.
