Gjykata e Posaçme pranoi të mërkurën kërkesën e Prokurorisë për Korrupsion dhe Krimin e Organizuar për sekuestrimin e pasurive të biznesmenit Anton Gjinaj, i dënuar për trafik droge në Spanjë.
“Nga aktet e administruara rezulton se me vendimin Nr.9 të vitit 2010, të Gjykatës Provinciale të Alicante, me seli në Elce, Spanjë është deklaruar fajtor i pandehuri Pashuk Gjini dhe është dënuar me 8 vjet e 9 muaj burgim për vepren penale të trafikimit të lëndëve narkotike në kuadër të grupit të strukturuar kriminal,” tha SPAK nëpërmjet një njoftimi për shtyp.
“Nga verifikimet e kryera nga ana e policisë gjyqësore në Drejtorinë e Përgjithëshme të Policisë së Shtetit rezulton se shtetasi Pashuk Gjini me datë 17.02.2011, ka bërë ndërrimin e emrit nga “Pashuk Gjini” në “Anton Gjinaj”,” shtoi njoftimi.
Prokuroria shpjegoi se nga analiza e fakteve dhe e dokumentacionit të administruar përsa i përket pasurive të shtetasit Anton (Pashuk) GJINAJ (Gjini) dhe familjarëve të tij, rezulton se kanë një nivel të pajustifikuar ekonomik dhe dyshohet se këto pasuri të paluajtshme apo të luajtshme, t'i kenë fituar si rezultat i veprimtarisë së tij kriminale që ai ka zhvilluar në Shqipëri dhe Spanjë.
Kërkesa e SPAK vjen një javë pasi një investigim i BIRN zbuloi detaje nga arrestimi i biznesmenit në Spanjë dhe mosveprimin e autoriteteve shqiptare për të hetuar pasurinë e tij.
Prokuroria e Posaçme Kundër Korrupsionit dhe Krimit të Organizuar njoftoi se sekuestrimi i pasurive të Gjinaj është bazuar në ligjin “Për parandalimin dhe goditjen e krimit të organizuar, trafikimit dhe korrupsionit nëpërmjet masave parandaluese kundër pasurisë,” i njohur gjithashtu si ligji anti-mafia.
Gjinaj po vuan dënimin për trafik droge në Shqipëri pasi është transferuar pak muaj më parë nga Spanja, fill pasi Gjykata e Tiranës i njohu atij të njëjtën masë dënimi prej 8.9 vitesh burg, të dhënë nga drejtësia spanjolle.
Gjykata ka vendosur sekuestron preventive të 6 kompanive në pronësi të subjektit dhe personave të lidhur, përfshirë kompaninë e ndërtimit ‘Alessio 2014', kontraktore e institucioneve publike në tenderat për rindërtimin e lagjes ‘5 maji' në Tiranë.
Gjithashtu, biznemenit dhe personave të lidhur i janë sekuestruar mijëra metra katrorë tokë truall, disa apartamente dhe ndërtesa, si dhe 4 automjete luksoze.