Pasi një gjykatë apeli refuzoi kërkesën e tij për lirim me kusht nga burgu, qindra njerëz protestuan dje në Athinë në shenjë solidarizimi me grevistin e urisë, Yannis Michailidis.
Anëtarë të partive të majta dhe grupeve të të drejtave të njeriut dhe qytetarë të tjerë u mblodhën në sheshin qendror Sintagma të Athinës ku u përleshën me policinë.
Media greke EFSYN raportoi se policia përdori granata trullosëse, gaz lotsjellës dhe ujë për të shpërndarë protestën dhe kreu 13 arrestime.
Grevisti Michailidis është transferuar ndërkohë nga burgu në spital. Agjencia e lajmeve Athino-Maqedonase raportoi se sipas mjekut të tij “gjendja e tij ka arritur në pikë të rrezikshme”.
Anarkisti 34-vjeçar ka qenë në grevë urie që nga muaji maj, duke kërkuar lirim me kusht, pasi ai pretendon se ka kryer më shumë se tre të pestat e dënimit të tij me 20 vjet burg. Gjykatat refuzuan lirimin e tij.
I njohur si “harkëtari i Sintagmës”, gjatë protestave në vitin 2011 ai vuri në shënjestër me një hark oficerët e policisë. Ai u arrestua dhe u akuzua për tentativë vrasjeje, por u la i lirë.
Në vitin 2013, së bashku me tre persona të tjerë, ai u arrestua në Kozani të Greqisë veriore, pas një grabitje të dyfishtë në një bankë dhe në një filial të Postës Helenike.
Katër të arrestuarit akuzuan policinë për torturë, ndërsa grabitjen e cilësuan si një zgjedhje të vetëdijshme që nuk kishte për qëllim pasurimin personal.
Ai u gjykua në vitin 2014 dhe u shpall fajtor për pjesëmarrje në tentativën e vrasjes së punonjësve të policisë në vitin 2011, grabitje të dyfishtë në vitin 2013 dhe posedim municioni. Ai u dënua me 20 vjet burg.
Në qershor 2019, ai u arratis nga burgu ku mbahej, por u arrestua sërish në janar 2020 nga policia antiterroriste. Gjyqtarët e bordit të apelit e refuzuan kërkesën e tij për lirim me kusht me arsyetimin e arratisjes së tij në vitin 2019.
