SPAK njoftoi të premten përmes një njoftimi për shtyp se kishte sekuestruar 66 mijë metra katrorë prona në zonën e Ishullit të Lezhëz dhe Malit të Rencit, prona që sipas prokurorisë janë përfituar përmes falsifikimit dhe aktiviteteve të tjera kriminale.
Prokuroria tha se përvetësimi i pronave kishte dalë nga hetimet e nisura në dhjetor 2019 ndaj një grupi të strukturuar kriminal, për trafik narkotikësh dhe vepra të tjera penale.
“Gjatë hetimit të këtij procedimi penal ka rezultuar se disa shtetas në bashkëpunim me njëri tjetrin dhe në bashkëpunim me zyrtarë shtetërorë, nëpërmjet dokumenteve të falsifikuara dhe veprimeve të tjera të kundërligjshme, kanë përfituar në mënyrë të paligjshme një sipërfaqe prej 66 000 m2 tokë në disa zona bregdetare në Lezhë, me një vlerë prej rreth 13 milionë euro. Këto prona kanë rezultuar se janë produkt i veprave penale të përshkruara më sipër”, thuhet në njoftim.
Tokat e sekuestruara janë ara në Ishull Lezhë dhe Malin e Rencit.
Kjo nuk është hera e parë që nga hetimet për trafik narkotikësh zbulohet tjetërsim i pronave në bregdet. Një operacion i koduar si Vol-Vo4 i zhvilluar në tetor 2018, ndërsa ndiqte fijet e trafikantëve të drogës zbuloi edhe tjetërsimin e qindra mijëra metrave tokë me vlerë të llogaritur 60 milion euro.
Gjykata e Posaçme Kundër Krimit të Organizuar dënoi në shkurt të vitit që shkoi vëllain e ish-deputetit socialist Arben Ndoka me 6.8 vjet burg , motrën e tij me 4 vjet shërbim prove dhe një sërë zyrtarësh të tjerë të përfshirë në tjetërsim.
Në një çështje tjetër Gjykata e Lezhës dënoi një mori zyrtarësh lokalë, përfshi ish-kryebashkiakun Fran Frroku, i cili u dënua në Shkallën e Parë dhe pret të gjykohet në Apel. Çështje të ngjashme me përfshirjen e zyrtarëve të lartë lokalë ka pasur në Kavajë, Vlorë, Shkodër dhe pjesë të tjera të vendit.