Shqiptarët bëjnë thirrje për siguri dhe mbrojtje më të mirë të plazheve pas një sërë aksidentesh dhe fatkeqësish, ku më i fundit është vdekja e një vajze shtatë vjeçare të martën, e cila u vra nga një skaf që po kalonte pranë vendit ku njerëzit po notonin.
Kryeministri Edi Rama e ka hedhur poshtë shqetësimin, por duke thënë se “deri dje ky ka qenë sezoni më i sigurt veror”.
“Ky është sezoni turistik më i organizuar, më i rregullt dhe më i pastër ndonjëherë falë punës së palodhur që filluam shtatorin e kaluar! Deri dje, ishte edhe sezoni më i qetë dhe më i sigurt, me plazhe publike dhe një rrjet vëzhguesish plazhi të organizuar si asnjëherë më parë!”, shkruan Rama në Twitter.
Megjithatë, një 18-vjeçar humbi jetën muajin e kaluar në qytetin e Durrësit, ndërsa shpëtoi nga mbytja vëllain e tij pesëvjeçar dhe shokun e tij. Një çift u godit edhe nga një skaf muajin e kaluar në plazhin e Jalit.
Adriatik Lapaj, një avokat dhe aktivist i shoqërisë civile, thotë se plazhet shqiptare “nuk janë më nën autoritetin shtetëror”.
“Mënyra se si po menaxhohet vija bregdetare po merr jetë, po largon turistët dhe po shkatërron mijëra e mijëra biznese që punojnë me ndershmëri dhe përkushtim”, shkroi ai në Facebook.
“Me skafet…menaxhohet aq keq sa njerëzit i shohin si mjete të rrezikshme, edhe pse ka qindra njerëz që punojnë me dinjitet dhe profesionalizëm me skafe, duke transportuar turistë. Shikoni vendet fqinje që kanë më shumë mjete detare dhe plazhe se ne, por ku aksidentet ndodhin shumë më rrallë”, shtoi ai.
Ish-ministri i brendshëm Sandër Lleshaj tha për Euronews Albania se “plazhet e Shqipërisë duhet të kthehen në menaxhim publik, jo privat. Administrimi privat i plazheve i ka bërë ato magnet për të gjithë njerëzit e etur për para që nuk respektojnë asnjë parim”.
Një investigim i BIRN vitin e kaluar tregoi se Shqipëria po përballet edhe me probleme me mungesën e rojeve të plazhit, gjë e cila ka kushtuar jetë njerëzish.
Që nga maji 2014, një vendim i qeverisë detyron operatorët e plazhit të kenë kulla 3 metra të larta dhe roje plazhi për çdo 200-250 metra plazh për të garantuar sigurinë.
Moszbatimi i vendimit vijon të shkaktojë humbje jete në bregdet.
