Një raport monitorimi i publikuar nga shoqata “Together for Life” tregon se përballja e Shqipërisë me problemin e ekstremizmit të dhunshëm dhe terrorizmit në mesin e viteve 2010 u shoqëua me informacion të ulët publik, raportime sporadike të medias si dhe mekanizma të ulët mbrojtjeje nga ana e institucioneve shtetërore.
I bazuar kryesisht në monitorimin e mediave shqiptare, raporti thekson se informacioni mbi këto çështje të ndjeshme buroi më së shumti nga mediat e huaja ose nga deklaratat e autoriteteve publike, ndërkohë që hulumtimet nga ana e gazetarëve ishin të pakëta.
“Vitet 2014-2016 u ndoqën nga informacioni i ulët publik prej autoriteteve shqiptare mbi masat që ata kishin ndërmarrë për të parandaluar qytetarët shqiptarë që të linin vendin për t’iu bashkuar konfliktit në Siri,” thuhet në raport.
“Në përgjithësi, platformat mediatike dhanë informacion të përgjithshëm duke u mbështetur te deklaratat e Policisë së Shtetit dhe njoftimet për shtyp…,” shtohet aty.
Raporti i publikuar nga shoqata “Together for Life”, me mbështetjen e Rrjetit Ballkanik për Gazetari Investigative BIRN, u bazua në një punë kërkimore dy mujore të përditshme në platformat mediatike të tilla si gazeta, media digjitale dhe televizione.
Qëllimi i këtij raporti është i dyfishtë: për të ekzaminuar rolin e medias në analizimin e kapaciteteve shtetërore për mbulimin e çështjeve të sigurisë të lidhura me terrorizmin dhe për të analizuar kuadrin ligjor.
Sipas raportit, media shqiptare filloi ta trajtojë gjerësisht terrorizmin vetëm gjatë vitit 2014, kur episodi i imamëve të vetëshpallur në disa xhami në rrethinat e Tiranës mori vëmendjen e publikut pas tetë arrestimeve nga policia shqiptare me akuzat për rekrutime me qëllime terrorizm.
Edhe pas vitit 2014, media shqiptare u fokusua tek qytetarët që largoheshin për t’iu bashkuar Shtetit Islamik, pa analizuar shpesh shkaqet dhe pasojat.
Sipas të dhënave kërkimore, pas vitit 2016 pati një rënie të raportimit mbi ekstremizmin e dhunshëm dhe terrozimin në mediat shqiptare, ku të rejat kryesore kishin të bënin me krijimin e Drejtorisë së Anti-Terrorit në Ministrinë e Brenshme.
Sipas gjetjeve të “Together for Life”, një shqetësim kryesor i institucioneve ligjore ka të bëjë me financimin e organizatave terroriste.
Në vitet 2015-2019 ka patur 54 raste të deklaruara si të dyshimta nga Drejtoria e Përgjithshme e Parandalimit të Pastrimit të Parave për financimin e terrorizmit, kryesisht nëpërmjet transfertave bankare – të cilat nuk janë konfirmuar në hetimet e mëvojshme.
Sipas raportit, Shqipëria aktualisht ka një mbrojtje të ulët ndaj ekstremizmit të dhunshëm dhe terrorizmit.
“Pavarësisht se Shqipëria ka ratifikuar konventa dhe protokolle ndërkombëtare për luftën kundër krimit të organizuar dhe terrorizmit si edhe ka krijuar struktura edhe njësi të veçanta për parandalimin e tyre, vijon të ketë mekanizma të ulëta mbrojtëse,” përfundon raporti.
