Mandro bëhet automatikisht anëtare e KLP-së, edhe nëse nuk merr votat e shumicës së deputetëve në seancë plenare. Emri i saj ishte përzgjedhur edhe në shortin e dytë të hedhur nga nënkomisioni i Ligjeve, por u rrëzua nga Kuvendi të enjten, ku mori 71 vota pro nga 84 që duheshin.
Kryetarja e Komisionit të Ligjeve, Klotilda Bushka hodhi në votim të gjithë emrat e kandidatëve të kualifikuar, por asnjëri prej tyre nuk u miratua, duke ia lënë zgjedhjen në dorë goglave.
“Kjo kandidaturë do t'i kalojë për votim seancës plenare të Kuvendit, nëse nuk arrihet shumica e kërkuar edhe këtë herë, ajo do të emërohet automatikisht anëtare e Këshillit të Lartë të Prokurorisë,” njoftoi Bushka në përfundim të shortit.
Gjatë seancës dëgjimore që zhvilloi Komisioni i Ligjeve në fillim të procesit të përzgjedhjes, Mandro, tha se një pjesë të mirë të karrierës në Shkollën e Magjistraturës ia kishte dedikuar punës për formimin profesional të gjyqtarëve e prokurorëve si drejtuese e programit të trajnimit të vazhdueshëm.
Mandro paraqiti para deputetëve një platformë për forcimin e KLP-së, duke vënë theksin te nevoja për një bilanc të performancës së këtij institucioni pas 4 vitesh funksionimi.
Për vendin vakant në KLP u kualifikuan katër kandidatë nga lista e trupës së pedagogëve të fakulteteve të drejtësisë dhe të shkollës së Magjistraturës; Arta Mandro, Kreshnik Myftari, Florian Bjanku dhe Juliana Bylykbashi.
Nga lista e kandidatëve u skualifikua Maksim Qoku, ish- nënkryetar i Këshillit të Lartë Gjyqësor, të cilit i mbaroi mandati në fund të vitit 2021. Në raportin e hartuar nga Sekretari i Përgjithshëm i Kuvendit, arsyeja e skualifikimit ishte mosplotësimi i kriterit të të qënit pedagog në një fakultet drejtësie në 5 vitet e fundit.
Në shortin e parë që hodhi nënkomisioni u përzgjodh kandidati Florian Bjanku, por Kuvendi e rrëzoi në votim.
Opsioni i zgjedhjes me short të anëtarëve të institucioneve drejtuese të drejtësisë po kthehet në një rregull për Kuvendin edhe pse ligji e ka parashikuar shortin si mekanizëm zhbllokues, kur nuk arrihet konsensusi politik. Në përzgjedhjen e fundit të vakancave në KLGJ dhe KLP Kuvendi dështoi të zgjidhte me shumicë të cilësuar anëtarët e rinj, duke ia lënë në dorë fatit.
