Një minator u vra të hënën pasdite në një prej galerive të nxjerrjes së kromit në Bulqizë.
Policia lokale njoftoi se “Në një subjekt minerar në Bulqizë, dyshohet se gjatë punës, është aksidentuar shtetasi K.L., 52 vjeç, i cili si pasojë e dëmtimeve të marra ka humbur jetën”.
Policia nuk e bëri me dije emrin e subjektit ku kishte ndodhur aksidenti. BIRN mësoi se ngjarja kishte ndodhur në zonën e parë të minierës në një galeri me numrin 16-të.
Rrethanat e ngjarjes mbeten ende të paqarta, por dyshohet se shkak i ngjarjes ishte shpërthimi i vonuar i eksplozivit të përdorur në galeri. BIRN mësoi nga një zyrtar i policisë, që kërkoi të mos identifikohej, se viktima punonte si zjarrmëtar dhe se ishte aksidentuar gjatë kontrollit të eksplozivit të pa shpërthyer.
Ky është aksidenti i katërt me pasojë vdekjen në miniera gjatë këtij viti. Dy viktima u regjistruan në mars në një galeri në Tropojë, ndërsa një rast tjetër u shënua po në Bulqizë në korrik.
Galeritë e nxjerrjes së kromit mbeten ndër vendet më të pasigurta të punës në Shqipëri. Të dhënat e mara nga BIRN nga Inspektorati i Punës vitin e kaluar në miniera e karriera u aksidentuan 28 persona, 6 prej të cilëve humbën jetën.
