Në një fjalim në Këshillin e Evropës në Strasburg të mërkurën, kryeministri shqiptar Edi Rama tha se raporti i senatorit zviceran Dick Marty i vitit 2011 për Këshillin e Evropës, i cili bëri akuza për krime lufte kundër oficerëve të Ushtrisë Çlirimtare të Kosovës, duhet të shqyrtohet si “një çështje të vërtet dhe drejtësie”.
Rama tha se sugjerimi i raportit ngriti dyshime të rreme se figura të larta të UÇK-së kishin trafikuar organe dhe se aktakuzat e mëvonshme të ish-oficerëve të UÇK-së konfirmojnë se pretendimet ishin të pavërteta.
“Nuk ka asnjë fjalë të vetme që përmend qartë apo nënkupton çështjen e trafikimit të organeve njerëzore. Është një çështje që nuk ekziston dhe kjo është arsyeja pse jam këtu sot”, tha ai.
Ai shpjegoi se arsyeja pse Shqipëria po reagon tani ndaj raportit të vitit 2011 është se ishte në pritje të formulimit të akuzave nga Dhomat e Specializuara e Kosovës në Hagë.
“Dhe kjo është arsyeja pse nuk isha këtu një vit më parë, apo vit para atij. Sepse ne pritëm me durim për të parë nëse do të dilte diçka”, shtoi ai.
Ai i përshkroi pretendimet për trafikim organesh si një “fantazi të fabrikuar në Kremlin dhe në një mënyrë shumë, shumë inteligjente, të trafikuar dhe të kontrabanduar në kanalet e politikës ndërkombëtare dhe të sjellë këtu në tempullin e të drejtave të njeriut”.
Parlamenti shqiptar miratoi në korrik një rezolutë të propozuar nga Partia Socialiste në pushtet e Ramës që dënon raportin e senatorit zviceran Marty në vitin 2011 për Këshillin e Evropës dhe i përshkroi pretendimet e tij si të pabaza.
Rezoluta iu dorëzua Këshillit të Evropës më 12 gusht.
Pretendimet e Dick Marty u hetuan nga një task forcë e Bashkimit Evropian. Raporti i task forcës zbuloi se kishte baza për akuza për krime lufte, megjithëse nuk mund të vërtetonte pretendimet për trafik organesh. Gjetjet e tij çuan në themelimin e Dhomave të Specializuara të Kosovës në Hagë në vitin 2015 për të gjykuar ish-guerrilasit për krime lufte.
Gjyqi i parë i një ish-luftëtari të UÇK-së të kohës së luftës në Dhomat e Specializuara të Kosovës filloi në vitin 2021. Ish-presidenti i Kosovës Hashim Thaçi aktualisht është në pritje të gjykimit për krime lufte dhe krime kundër njerëzimit.
Dhomat e Specializuara janë pjesë e sistemit gjyqësor të Kosovës, por të vendosura në Holandë dhe me personel ndërkombëtar. Ato u krijuan nën presionin e aleatëve perëndimorë të Kosovës, të cilët druheshin se sistemi i drejtësisë së Kosovës nuk ishte mjaftueshëm i fuqishëm për të gjykuar rastet e UÇK-së dhe për të mbrojtur dëshmitarët nga ndërhyrja.
Por e ashtuquajtura “Gjykatë Speciale” nuk shihet me sy të mirë nga shumë shqiptarë të Kosovës, të cilët e shohin atë si një fyerje për luftën e UÇK-së për çlirimin nga sundimi serb.