Shpenzimet e shqiptarëve për shërbime shëndetësore private arritën në së paku 137 milionë euro, me një rritje dramatike prej 46% në vitin 2021 në krahasim me vitin e mëparshëm. Të dhënat e bilanceve të kompanive kryesore që operojnë në këtë sektor pasqyrojnë rritje marramendëse në shitje dhe fitime për kompanitë të cilat, gjatë periudhës së pandemisë së koronavirusit të ri, ofruan shërbime diagnotikuese, qoftë testime për COVID-19, qoftë analizat që nevojiteshin për të trajtuar këtë sëmundje.
BIRN analizoi të dhënat e dhjetë kompanive kryesore të sektorit, të tilla si Spitali Amerikan, Spitali Continental, apo International Hospital, si dhe kompanitë e shërbimeve të diagnostikimit Genius, Intermedica e të tjera. (Të dhënat financiare mund të gjenden këtu).
Të ardhurat totale të të dhjetë kompanive u rritën në 16.4 miliardë lekë në vitin 2021, nga 11.3 miliardë në vitin 2020 dhe 9.5 miliardë që ishin në vitin 2019, viti para pandemisë së koronavirusit të ri.
Rritja e të ardhurave është shumë më e fortë për kompanitë e laboratorëve se sa për spitalet. Spitali Amerikan, kompania më e madhe në treg që zë 44% të të ardhurave të operatorëve të marrë në analizë, shënoi rritje të të ardhurave të veta me 21% në vitin e kaluar duke arritur në 7.2 miliardë lekë. Kompania gjithsesi vijon të jetë me humbje. Ajo e mbylli vitin financiar me humbje në masën 181 milionë lekë. Që kur u themelua, kjo kompani ka humbje të akumuluara në masën 1.45 milionë lekë.
Spitalet e tjera më të vogla njohën gjithashtu rritje masive të të ardhurave ndërsa një pjesë e tyre arritën të realizojnë edhe fitime, në një treg që përgjatë viteve të fundit është njohur si një sektor i vështirë për të realizuar fitime.
International Hospital, kompania që operon spitalin Hygeia, e cila është nën pronësinë e Spitalit Amerikan, realizoi gjatë vitit të kaluar të ardhura në masën 3.2 miliardë lekë, me rritje 17% kundrejt vitit të kaluar. Kompania gjithsesi mbylli një vit tjetër me humbje në masën 30 milionë lekë.
Spitali Continental, i cili tërhoqi vitin e kaluar vëmendjen e medias pasi u ble fillimisht nga fondacioni Firdeus i klerikut popullor mysliman Elvis Naçi dhe më pas, në fund të vitit, nga Kryegjyshata Bektashiane, duket se ka pasur më shumë fat në duart e besimtarëve nga sa kishte në duart e pronarëve të mëparshëm. Gjatë vitit 2021, kompania rriti të ardhurat e veta me 46% duke arritur në 342 milionë lekë. Kompania arriti të nxjerrë edhe fitime në masën 18.7 milionë lekë. Kompania gjithsesi ka humbje të stërmëdha nga vitet e kaluara.
Dy spitale të tjera më të vogla sa i përket të ardhurave, Salus dhe Spitali Europian, njohën gjithashtu rritje të konsiderueshme. Salus realizoi të ardhura në masën 755 milionë lekë me rritje 72% në krahasim me vitin 2020 ndërsa realizoi fitime në masën 73 milionë lekë, nga humbje në masën 35 milionë lekë që kishte dalë në vitin paraardhës. Spitali Europian realizoi të ardhura në masën 404 milionë lekë me rritje 129% në krahasim me vitin e mëparshëm. Kompania gjithsesi vijoi të dalë me humbje.
Laboratorët që ofruan shërbime diagnostikimi në periudhën e errët të pandemisë realizuan të ardhura dhe fitime marramendëse. Genius Lab njohu një rritje të të ardhurave me pesë herë në krahasim me vitin e mëparshëm ndërsa fitimet iu katërfishuan. Kompania realizoi të ardhura në masën 2.1 miliardë lekë dhe fitime në masën 1.16 miliardë. Me një normë fitimi mbi të ardhurat 56%, kjo rezulton kompania më e suksesshme në treg në periudhën e pandemisë. Ajo zotëron 13% të të ardhurave totale nga të dhjetë kompanitë e analizuara.
Intermedica Center njohu gjithashtu dyfishim të të ardhurave dhe të fitimeve. Kompania pati të ardhrua në masën 1.93 miliardë lekë dhe fitime në masën 591 milionë lekë.
Biocheck Diagnostic Center, një kompani krahësimisht më e vogël, shënoi rritje 77% në të ardhura. Pandemia e koronavirusit të ri filloi në mars të vitit 2020 por shënoi kulmin përgjatë vitit 2021.
Sipas statistikave zyrtare, deri më sot nga COVID-19 janë prekur rreth 332 mijë shqiptarë ose rreth 12% e totalit të popullsisë. Të dhëna indirekte sugjerojnë se shifra reale e të sëmurëve është disa herë më e lartë se sa kjo. Shpenzimet për analiza dhe për shërbime spitalore private duket se janë vetëm një pjesë shumë e vogël e shpenzimeve që shqiptarët paguan për të përballuar sëmundjen COVID-19, në kushtet kur shërbimi shëndetësor publik efektivisht nuk ofron shërbime diagnostikimi të mbuluara nga paratë e taksapaguesve.
