Këshilli i Lartë Gjyqësore vendosi të martën pezullimin e procedimin disiplinor ndaj magjistratit Bevis Shehaj, të kërkuar nga Inspektori i Lartë i Drejtësisë, deri në marrjen e formës së prerë të vendimit të Komisionit të Pavarur të Kualifikimit, i cili e ka shkarkuar Shehaj nga detyra. Shehaj e ka ankimuar këtë vendim në Kolegjin e Posaçëm të Apelimit.
Vendimi i pezullimit, i pesti i marrë nga KLGJ me të njëjtat arsye për procedime disiplinore të nisura nga ILD, u mor pas një seancë në të cilën palët paraqitën argumentet për rastin.
Inspektori i Lartë i Drejtësisë kërkoi në seancë masë disiplinore ndaj Shehajt, por pasi e cilësoi shkeljen e tij të lehtë kërkoi vetëm ndëshkim “me vërejtje publike”.
Duke pretenduar se Shehaj nuk kishte zbatuar një vendim të dhënë nga Këshilli i Lartë Gjyqësor lidhur me kancelaren e Gjykatës Administrative të Vlorës dhe nuk kishte respektuar dispozitat ligjore dhe nënligjore që rregullojnë organizimin dhe funksionimin e gjykatave, ILD e cilësoi shkeljen “të natyrës që magjistrati duhet të mbajë përgjegjësi disiplinore”.
Shehaj i cili ishte i pranishëm në seancë i kundërshtoi gjetjet e ILD-së, madje akuzoi Inspektorin e Lartë të Drejtësisë për presion dhe tha se ILD ishte paragjykuese në këtë proces.
Shehaj pretendoi se presioni dhe ankesat ndaj tij lidheshin me vendimmarrje në një proces gjyqësor. Ai tha se i ishte bërë presion nga një media kombëtare dhe po ashtu ish-drejtues të saj që kishin interesa në çështje të gjykatës. “Nuk i jam nënshtruar disa presioneve sa i përket një çështje konkrete”, tha ai duke pretenduar se akuzat nuk qëndronin. Ai po ashtu tha se procedimi ishte në shkelje të afateve, ndërsa këmbënguli në debat me anëtarë të KLGJ-së se nuk kishte bërë shkelje dhe se kishte zbatuar udhëzimet siç i kishte kuptuar.
Megjithatë Shehaj pranoi se Gjykata Administrative e Vlorës ishte në një situatë të rëndë, një mjedis pune më shumë probleme dhe shpesh në paligjshmëri. “Ju duhet të kuptoni se unë jam produkt i atij mjedisi pune”, tha Shehaj në përgjigje të pyetjeve.
