Serbët dhanë dorëheqje nga pozicionet e tyre në institucionet shtetërore në katër komuna veriore të Kosovës me shumicë serbe të shtunën, me pretendimin se marrëveshjet e ndërmjetësuara nga BE-ja midis Serbisë dhe Kosovës në Bruksel po shkelen.
Dorëheqjet erdhën pas një takimi në qytetin e Zveçanit të organizuar nga partia serbe Lista Serbe e mbështetur nga Beogradi.
Lista Serbe tha se kryetarët e komunave me shumicë serbe, këshilltarët, deputetët, gjyqtarët, prokurorët, stafi gjyqësor dhe oficerët e Policisë së Kosovës të gjithë kanë lënë punën e tyre.
Gjatë takimit të së shtunës në Zveçan, zyrtarët policorë në mënyrë simbolike hoqën uniformat e policisë së Kosovës, për t’u duartrokitur nga pjesëmarrësit.
“Është pikërisht për shkak të vendosmërisë sonë për të respektuar të drejtën ndërkombëtare publike dhe për të mbrojtur Marrëveshjen e Brukselit që ne kemi vendosur të largohemi nga të gjitha institucionet politike, Kuvendi i Kosovës, qeveria dhe katër komunat në veri të Kosovës”, tha kreu i Listës Serbe, Goran Rakiq, për mediat.
Ai shtoi se vendimi mbetet në fuqi derisa Kosova “të fillojë të respektojë marrëveshjet që janë rënë dakord”.
Ai tha se Kosova duhet të tërheqë vendimin që shoferët serbë me targa të Kosovës t’i ndërrojnë ato me targa të Kosovës dhe të themelojë Asociacionin e shumëpritur të Komunave Serbe për të përfaqësuar interesat e serbëve në Kosovë.
Ky veprim erdhi dy ditë pasi drejtori rajonal i Policisë së Kosovës për veriun me shumicë serbe të vendit, Nenad Djuriq, u pezullua nën dyshimin se bëri thirrje për rezistencë.
Djuriq tha të enjten se policia në veri të Kosovës nuk do të zbatojë vendimin e qeverisë për të shpërndarë vërejtje për drejtuesit që kanë automjete me targa të lëshuara nga Serbia, të cilat konsiderohen të paligjshme nga autoritetet e Kosovës. Një ditë më vonë ai deklaroi se nuk do të kthehet në policinë e Kosovës.
Qeveria e Kosovës vendosi javën e kaluar që të shtyjë zbatimin e vendimit për t’i detyruar drejtuesit e automjeteve me targa të lëshuara nga Serbia t’i ndërrojnë ato me targa të Kosovës nga 1 nëntori.
Tashmë do të ketë një zbatim në faza të ndryshimit të targave të Kosovës që do të vazhdojë deri më 21 prill të vitit të ardhshëm.
Drejtuesit e automjeteve që vazhdojnë të përdorin targa serbe fillimisht do të qortohen, më pas do të gjobiten dhe më pas do të detyrohen të vendosin targa provë në automjetet e tyre.
BIRN kontaktoi zëdhënësin e qeverisë së Kosovës dhe ministrin e punëve të brendshme Xhelal Svecla për të kërkuar informacion se si do të funksionojnë institucionet e Kosovës pas dorëheqjeve, por nuk mori asnjë përgjigje deri në momentin e publikimit.
Blerim Vela, Shefi i Stafit në Kabinetin e presidentes së Kosovës, Vjosa Osmani, tha në një postim në Tëitter se “Serbia po i detyron dhe i nxit serbët e Kosovës që të braktisin punën e tyre në institucionet e Kosovës”.
Vela tha gjithashtu se “Serbia shkeli në mënyrë të njëanshme të gjitha marrëveshjet e Brukselit për shpërbërjen e strukturave të saj ilegale në Kosovë”.
Ai këmbënguli megjithatë se institucionet e Kosovës do të mbeten multietnike.
