Një raport i opinionit publik holandez mbi anëtarësimin në BE të Ballkanit Perëndimor, i përpiluar nga BIEPAG, Grupi Këshillimor i Politikave “Ballkanit në Evropë”, arrin në përfundimin se holandezët janë bërë më të pranueshëm për shkak të luftës në Ukrainë, duke e konsideruar tani procesin e zgjerimit të rëndësishëm për sigurinë e Evropës.
Raporti, i titulluar “Qëndrimi i publikut dhe vendimmarrësve ndaj zgjerimit të BE-së në Ballkanin Perëndimor në Holandë”, arrin në përfundimin se lufta në Ukrainë është një shtytës për zgjerimin e BE-së, sepse më shumë holandezë tani mendojnë se zona e Ballkanit Perëndimor duhet të merret në konsideratë për anëtarësimin në BE të paktën për arsye gjeopolitike.
“Ndërsa pothuajse të gjithë shqetësohen për luftën në Ukrainë, mbi 40 për qind e miratuesve (të procesit të zgjerimit) duan që BE-ja të zgjerohet shpejt për shkak të luftës. Vetëm dhjetë për qind janë kundër kësaj”, thuhet në raport.
Ai shpjegon se “kur diskutohej lufta në Ukrainë dhe çfarë do të thotë ajo për BE-në dhe Holandën, në grupet e fokusit, edhe ata që nuk ishin pro, tani ishim më të hapur ndaj anëtarëve të rinj, pasi më shumë vende do të nënkuptonin një Bashkimi Evropian më të fortë në aspektin gjeopolitik”.
Megjithatë, sipas raportit, ndërsa 80 për qind e publikut holandez shqetësohet për luftën në Ukrainë, vetëm 26 për qind duan që BE-ja të zgjerohet shpejt për shkak të luftës.
Në përgjithësi, holandezët mbeten të ndarë pak a shumë në gjysmë kur bëhet fjalë për pranimin e zgjerimit të Ballkanit Perëndimor.
Nga 1,500 pjesëmarrës në sondazh, rreth 45 për qind thanë se e miratojnë zgjerimin në një farë mase. Rreth 66 për qind e popullsisë holandeze beson se nëse një vend përmbush kriteret, ai duhet të bashkohet me BE-në, sipas raportit.
Për më tepër, u pa një lidhje midis pikëpamjeve të BE-së në tërësi dhe pranimit ose jo të procesit të zgjerimit të vendeve të Ballkanit Perëndimor. Ata që e shohin BE-në në një mënyrë më pozitive janë gjithashtu më të prirur për të mbështetur procesin e zgjerimit.
Tobias Spori, një nga autorët e raportit, kur e prezantoi atë të premten, pohoi se një përfundim i ngjashëm ishte arritur kur bëhej fjalë për Francën.
Thijs Reuten, një anëtar i Parlamentit Evropian nga Holanda, tha se BE-ja duhet të vazhdojë me procesin e zgjerimit të “BB6” dhe me liberalizimin e vizave për Kosovën.
Ambasadorja e Shqipërisë në Holandë, Adia Sakiqi, tha se “për vendet tona është përfshirje, jo zgjerim”, duke pasur parasysh se vendet e Ballkanit Perëndimor janë tashmë gjeografikisht në Evropë.
BIEPAG është një grup ekspertësh i themeluar në vitin 2013 nga Fondi Evropian për Ballkanin dhe Qendra për Studime të Evropës Juglindore e Universitetit të Gracit.
