Komisioneri Shtetëror i Zgjedhjeve, Ilirian Celibashi, konstatoi se “Agron Kapllanaj dhe Kleo Murataj nuk përfshihen në kushtet e ndalimit për të ushtruar funksionin publik të deputetit”.
Të dy kandidatët kishin deklaruar dënime të mëparshme në formularin e dekriminalizimit, por këto dënime kishin kaluar afatin kohor që do t’i penalizonte ata në bazë të ligjit “Për garantimin e integritetit të personave që zgjidhen, emërohen ose ushtrojnë funksione publike”.
Raporti i KQZ-së për Agron Kapllanaj konstatoi se verifikimi i thelluar i bërë nga prokuroria nuk nxori të dhëna të reja nga ato që ishin deklaruar prej tij në formular, përveç dënimit në Firence, Itali në vitin 2004 me 2 vjet heqje lirie e 200 euro gjobë për veprën penale të vjedhjes.
“Ka përfunduar dënimin në vitin 2006, ka kaluar afati 10 vjeçar i parashikuar në ligj. Subjekti konsiderohet i rehabilituar”- thuhet në këtë raport.
Kapllanaj ka qenë kryetari i bashkisë së Mallakastrës dhe një figurë qendrore e PD-së në këtë qytet. Ai është favorit për të qenë sërish kandidat për kryetar bashkie në zgjedhjet e 14 majit.
Ndërsa Murataj që vjen nga radhët e partisë së Tom Doshit, një tjetër figurë e verifikuar nga ligji i dekriminalizimit, rezulton sipas Prokurorisë, i dënuar nga gjykata e Tiranës në vitin 1991 me 2 muaj riedukim për veprën penale “armëmbajtje pa leje”.
Dënimi ishte deklaruar në formular dhe KQZ vendosi se ai nuk ishte në kushtet e ndalimit për të kandiduar në zgjedhje.
I miratuar në vitin 2015, ligji i njohur gjerësisht si ligji i dekriminalizimit erdhi si nevojë e pastrimit të politikës shqiptare nga personat me rekorde kriminale, por shtatë vjet më pas, ekspertët e shohin me dyshim suksesin e tij në vetëpastrimin e partive politike – çka synohej të ishte edhe qëllimi kryesor afatgjatë i këtij ligji.
Edhe pse qindra kandidatë apo zyrtarë të niveleve të ndryshme janë penalizuar për shkak të ligjit, Instituti i Studimeve Politike, ISP, – një think tank që monitoronin në vazhdimësi zbatimin e procesit të dekriminalizimit – vëren se partitë politike nuk i kanë përjashtuar këta zyrtarë nga radhët e tyre, duke ecur në kah të kundërt me frymën e ligjit.
