Policia e Durrësit arrestoi 3 persona që dyshohen që në bashkëpunim me njëri-tjetrin i morën 5000 m² një qytetari, duke e regjistruar në Hipotekën e Durrësit sikur të ishte e tyre.
60-vjeçari me iniciale Artur Isaku, ish-jurist i Hipotekës së Durrësit dyshohet se ndihmoi për të realizuar përvetësimin e tokës 2 të arrestuarit e tjerë, 72-vjeçarin me iniciale Z. D. dhe 68-vjeçarin me iniciale F. I. gjithashtu, banues në Durrës.
Procesi, sipas policisë, u realizua duke përdorur dokumente të falsifikuara. Sipas njoftimit të policisë ata u zbuluan pas hetimit disamujor me metoda proaktive.
Ata dyshohen për veprat penale “Shpërdorimi i detyrës” dhe “Falsifikimi i dokumenteve”, kryer në bashkëpunim. Policia e Durrësit sqaroi për BIRN se toka e përvetësuar ndodhej në Fshatin Kameras, në Njësinë Administrative Manëz.
Prokuroria e Durrësit ka regjistruar më herët edhe hetime të tjera ku burra të moshuar janë identifikuar si të përfshirë në skema të përvetësimit të pronave përmes bashkëpunimit me zyrtarët shtetërorë.
Në tetor të vitit 2019, 3 ish-drejtues të hipotekës së Durrësit dhe një mori ish-zyrtarësh u arrestuan bashkë me 5 përfitues të 68 mijë metrave katrorë tokë në operacionin e koduar “Rodoni”. Ata akuzohen për falsifikim dhe pastrim të produkteve të veprës penale.
Në skemë sipas prokurorisë ishin përfshirë tre ish-drejtues të Zyrës së Rregjistrimit të Pasurive të Paluajtshme në Durrës, Ardian lIjazaj, Edlira Nova dhe Adrian Kona, si edhe Sulejman Ibrahimi, ish-kryetar i Komunës së Ishmit dhe disa anëtarë të komisionit të ndarjes së pronave, kryesisht nga fshati Bizë dhe ish-juristë të hipotekës. Po ashtu u arrestuan edhe 5 persona që u akuzuan si përfitues të pronës.
BIRN zbuloi se nga përgjimet e Prokurorisë së Durrësit u faktua zhdukja e referencave të regjistrimit të pasurive nga arkiva e hipotekës, bashkë me 30-40% të dosjeve fizike dhe se ato kishin përfunduar në bagazhet e makinave të zyrtarëve.
Gjiri i Lalzit mbetet zona më e lakmuar dhe ku janë evidentuar skema të mirëfillta të përvetësimit të tokave. Dy vjet pas nisjes së hetimeve për atentatin në autostradë ndaj ish-prokurorit Arian Ndoja, rastësisht prokurorët gjetën prova me video për korrupsion dhe falsifikime me tokat në Gjirin e Lalzit.
Gjykata e Posaçme Kundër Krimit të Organizuar dhe Korrupsionit urdhëroi arrest shtëpie për një zyrtar dhe arrest me burg për një eksponent të dyshuar të krimit të organizuar, Aleksandër Laho, i njohur gjithashtu edhe si Pëllumb Muharremi, apo me nofkën Rrumi, “i forti i Sukthit”.
