Këshilli i Lartë Gjyqësor përzgjodhi të enjten me një procedurë shorti anëtarët e komisionit që shqyrton ankesat ndaj vendimeve të ILD-së për pushimin ose arkivimin e hetimeve ndaj gjyqtarëvë, KPSHA.
Komisioni shqyrton të gjitha ankimet kundër vendimeve të Inspektorit të Lartë të Drejtësisë. Ai përbëhet nga tre anëtarë, dy jogjyqtarë dhe një gjyqtar, si dhe dy anëtarë zëvendësues, një jogjyqtar dhe një gjyqtar, të zgjedhur me short nga Këshilli.
Pas hedhjes së shortit anëtarë të KPSHA-së u përzgjodh Ilir Rusi, Irena Plaku dhe Alban Toro dhe si zëvendësues Klodian Kurushi dhe Yllka Rupa.
Në short nuk morën pjesë për shak të ngarkesës anëtarët e KLGJ-së, Briken Ukperaj, Dritan Hallunaj, Marçela Shehu dhe Fatmira Luli.
Gjatë të njejtës mbledhje, KLGj shtyu shqyrtimin e kërkesës së ILD-së për procedimin disiplinor ndaj gjyqtarit Sajmir Ujkashi.
Shtyrja u bazua në kërkesën e depozituar nga magjistrati për pamundësi shëndetësore nga data 5 janar deri në datën 20 janar.
Ujkashi ushtron funksionin si gjyqtar i Gjykatës së Rrethit Gyqësor Kukës. ILD ka propozuar që ndaj tij të vendoset si masë ndëshkuese pezullimi nga detyra për një periudhë dyvjeçare.
BIRN mësoi se hetimi disiplinor ka filluar për shkelje të legjislacionit material, shkelje disiplinore me dashje si dhe cënim të imazhit të magjistratit dhe të besimit tek sistemi i drejtësisë. Hetimi disiplinor është bazuar në një vendimarrje për ulje dënimi dhe lirim në kundërshtim me ligjin për një person që ishte dënuar me 15 vjet burgim, si dhe për moszbatim të legjislacionit në dy raste ekstradimi.
Relator i çështjes ndaj Ujkashit është anëtari i KLGj-së, Ridvan Hado.
KLGj vendosi që kërkesa e ILD-së ndaj Ujkashit të shqyrtohet me 13 shkurt në orën 12:00.
