Edhe pse ishte e qartë që gjyqi do të shtyhej, Svetlana Timofeeva, blogerja ruse e arrestuar me akuzat për spiunazh në Shqipëri dhe e kërkuar për të njëjtat akuza në Rusi, u përpoq të bënte të qartë para gjykatës se nuk donte të ekstradohej në Rusi.
Kur gjyqtari i seancës, Elis Dine kërkoi gjeneralitetet dhe pyeti nëse ishte e martuar, Timofeeva tha përmes përkthyeses se ishte divorcuar për shkak të luftës së Rusisë ndaj Ukrainës. “Unë isha kundër luftës, ai e mbështeste”, tha ajo në një sallë ku veç dy avokatëve Fatmir Lushi dhe Isuf Shehu, ishin të pranishëm vetëm gazetarët.
Gjyqtari Dine bëri me dije se seanca do të ndërpritej për shkak të mungesës së prokurorit që kishte paraqitur raport mjekësor.
Timofeeva ndodhet e arrestuar në Shqipëri që pas një incidenti në ish Uzinën e Armëve në Gramsh. Ajo akuzohet sëbashku me Mikhail Zorin dhe ukrainasin Fedir Alpatov, se po kryenin spiunazh. Pas arrestimit në gusht ndaj Timofeevës u lëshua një urdhër arresti edhe nga Moska për akuza të ngjashme.
Ministria e Drejtësisë e referoi urdhrin në prokurori dhe prokuroria e Elbasanit i ka kërkuar gjykatës shqyrtimin e tij. Në seancën e të enjtes nuk u bënë të ditura qëndrimet e palëve, por Timofeeva e kundërshton ekstradimin. Ajo thotë se në Rusi rrezikon të persekutohet për shkak të qëndrimeve të saj kundër luftës.
